Taldyqorǵanda Sherzat Polattyń ólimine qatysty atyshýly qylmystyq istiń sot otyrysy jalǵasyp jatyr. Qoǵam nazaryn aýdartqan bul oqıǵada basty sottalýshy retinde tanylǵan Abzal Shynasyl tyń málimdeme jasady. Ol marqumnyń aǵasy Nurǵanat Gaıpbaevty pyshaqtaǵanyn sot zalynda ashyq moıyndady. Aıta keterligi, Shynasyl óziniń bet-beınesin tikeleı efırde kórsetýge qarsy bolmady, dep habarlaıdy Egemen.kz.
Sot prosesi barysynda belgili bolǵandaı, tergeý kezinde ol Sherzat Polatty óltirgenin moıyndap, aldyn ala jaýabyn bergen. Alaıda búgingi otyrysta ol bul málimdemesinen bas tartty. Onyń aıtýynsha, mundaı sheshimdi sottalýshy Shyńǵys Belǵojaevpen aqyldasa otyryp qabyldaǵan. Shynasyldyń sózinshe, jazany jeńildetý maqsatynda Sherzattyń ólimin óz moınyna alýǵa kelisip, sonyń negizinde jalǵan jaýap bergen.
Sonymen qatar, Nurǵanat Gaıpbaevty pyshaqtaǵanyn da shyn máninde ózi emes, sol kezde Shyńǵys Belǵojaevtyń «pyshaqty men tyqtym» dep tergeý organdaryna jalǵan kýálik bergeni málim boldy.
Sot prosesi bastalǵaly beri 9 sottalýshynyń 8-i tergeldi. Al qalǵan bir sottalýshy — Dıdar Qalıahmet — aldyńǵy otyrysta jaýap berýge psıhologııalyq turǵyda daıyn emes ekenin aıtyp, ýaqyt suraǵan bolatyn.
Qazirgi tańda Sherzat Polatty naqty kim óltirgeni áli de belgisiz kúıde qalyp otyr. О́ıtkeni sottalýshylardyń eshqaısy bul qylmysty tolyq moıyndaǵan joq. Is materıaldary men tergeý barysy boıynsha qaıshylyqtar kóp. Osyǵan baılanysty sot otyrysy búgin tústen keıin qaıta jalǵasatyn bolady.
Bul is qoǵamda úlken rezonans týdyrǵandyqtan, jurtshylyq ta, BAQ ókilderi de sot barysyn jiti baqylap otyr. Al shyndyqtyń beti qashan ashylary ázirge belgisiz.