Serke Qojamqulov atyndaǵy Jezqazǵan qazaq mýzykalyq drama teatrynda uly jazýshy Sh.Aıtmatov povesi jelisimen jazylǵan «Teńiz jaǵalaı júgirgen tarǵyl tóbet» spektakliniń aldyn ala kórsetilimi ótti, dep jazady Egemen.kz.
Qoıylymdy sahnalaǵan belgili rejısser Talǵat Temenov. Shyǵarmaǵa bir otbasynyń basyna túsken qıyndyq arqaý bolady. Teńizge shyqqan olar daýylǵa tap bolyp, ómir men ólimniń tarazasyna túsip qalady.
Urpaǵynyń amandyǵyn oılaǵan dana qart shól qysqanyna qaramastan bir urttam sýdy aýzyna almaı, urpaǵyn aman saqtap qalý úshin qarańǵy túnde sýǵa sekirip ketedi. Aqsaqaldyń eki uly da sýdan tatyp almady. Tirshilik tynysy nemerege buıyrady.
Urpaq jalǵastyǵyn dáriptegen Shyńǵys Aıtmatovtyń «Teńiz jaǵalaǵan tarǵyl tóbet» povesi uly shyǵarmalardyń biri ári biregeıi. О́ıtkeni bul qundy dúnıe bolashaq urpaq úshin jasalǵan dúnıe. Spektakl kez kelgen kórermenge oı salady. Sebebi munda erteńgi kúnnen úmitti joǵaltpaý, adamdy súıýdiń eń tamasha úlgisi bar.
Qazaqstannyń halyq ártisi Talǵat Temenov:
«Jalpy Aıtmatov álem ádebıetindegi eń oıshyl jazýshynyń biri. Sondyqtan bul shyǵarma kóp teatrlarda qoıylmaıdy. Sebebi sahnalyq qoıylymy óte kúrdeli. Soǵan qaramastan biz Serke Qojamqulov atyndaǵy teatrǵa osy qoıylymdy ákeldik. Bul teatrda úlken ártister bar. Sonyń biri Qazaqstannyń Halyq ártisi Dosjan Janbotaev. Osy teatrǵa kópten beri kóp úlken rejısserlar kelmegen. Sondyqtan osy týyndynyń sahnalanýy jergilikti teatr ártisteri, talantty jastar úshin úlken mektep dese bolady. Naqtyraq aıtqanda Aıtmatovtyń akademııasynan ótý ártister úshin úlken múmkindik», deıdi.
Qoıylymda teatrdyń ártisterinen basqa jergilikti kolledj stýdentteri, mektep oqýshylary da oınaıdy. Balalardy sahnada oınatý qıyn bolsa da rejısser Talǵat Temenov osy salmaqty óz moınyna alǵan.
Spektakldiń premerasy mamyr aıynyń 27 kúni shymyldyǵyn ashady.