Qazaqstanda 2025 jylǵy 12-16 mamyr aralyǵynda Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń bastamasymen jáne QR Densaýlyq saqtaý mınıstrliginiń qoldaýymen Reprodýktıvtik densaýlyq aptalyǵy ótti.
Is-sharanyń maqsaty — halyqtyń reprodýktıvtik densaýlyq, jynystyq jolmen beriletin ınfeksııalyq aýrýlardyń, adam papılloma vırýsynyń profılaktıkasy máseleleri jónindegi habardarlyǵyn arttyrý boldy.
Bes kún boıy elimizdiń barlyq óńirlerindegi medısınalyq-sanıtarııalyq alǵashqy kómek uıymdary men Jastar densaýlyǵy ortalyqtarynda Ashyq esik kúnderi ótti. Reprodýktıvtik jastaǵy erler men áıelder, jasóspirimder men jastar konsýltasııalyq jáne aqparattyq qoldaý aldy.
Bes kún boıy otbasyn josparlaý, áıelderdiń densaýlyǵy, erlerdiń densaýlyǵy, jastar jáne JJBI, APV profılaktıkasy sııaqty jeke taqyryptarǵa arnaldy.
Aptanyń negizgi qorytyndylaryn shyǵara otyryp, Densaýlyq saqtaý mınıstrliginiń jelisi boıynsha respýblıka kóleminde 14 350 is-shara ótkizilgenin atap ótken jón. Jalpy joba 358 498 qazaqstandyqty qamtydy, olardyń ishinde 83 389 er adam, 157 476 áıel jáne 117 633 jasóspirim bar.
Gınekologtar, ýrologtar, ınfeksıonıster jáne basqa da mamandardyń qatysýymen 3 636 aǵartýshylyq kezdesý men dáris ótti.
BAQ-ta 238 saraptamalyq pikir, suhbat pen baıandama jarııalandy.
Halyqtyń eń belsendi qatysýy men qyzyǵýshylyǵy Almaty, Astana qalalarynda, sondaı-aq Aqtóbe, Túrkistan jáne Qaraǵandy oblystarynda baıqaldy.
Kampanııa barysynda jasóspirimderge erekshe nazar aýdaryldy: 117 myńnan astam bala densaýlyq pen aýrýlardyń profılaktıkasy týraly senimdi aqparatqa qol jetkizdi. Dárigerler men mamandar mektepter men kolledjderde ǵana emes, sıfrlyq ortada - áleýmettik jeliler men telearnalar arqyly da jumys júrgizdi.
«Reprodýktıvtik densaýlyq mádenıetin jáne profılaktıkalyq medısınany damytý — bolashaq urpaqtyń densaýlyǵyna qosqan eń mańyzdy úles. Barlyq óńirlerge, medısına qyzmetkerlerine, áriptester men BAQ-qa belsendi qatysqany úshin alǵys bildiremiz. Reprodýktıvtik densaýlyq aptalyǵy — memleket, densaýlyq saqtaý júıesi men qoǵamnyń kúshin biriktiretin jyl saıynǵy bastamaǵa aınalady», — dedi QR Densaýlyq saqtaý mınıstri.