Aýdan kelbeti ajarlana tústi

Kúni keshe «Baıqońyr» aýdany ákimdiginiń bastamasymen «Amanat» partııasy «Jastar rýhy» jastar qanatynyń 100 volonteri qala turǵyndarymen birge A.Pýshkın kóshesindegi kanal mańyn tazalady. Qaladaǵy volonterlik uıym­dardyń belsendi jastary apta saıyn turǵyndarmen birge eko­logııalyq aksııalarǵa qatysady. Búgin bir uıym senbilikke shyqsa, keler apta ekinshi, úshinshi uıymnyń eriktileri qural-saımanyn saılaıdy. «Jastar rýhy» jastar qanatynyń volonterleri ótken beısenbide elordadaǵy «Almaty» aýdanynda kóshe boıyn tazalaǵan.

A.Pýshkın kóshesindegi kanal mańynda eriktilermen birge «Baıqońyr» aýdany ishki saıasat bóliminiń basshysy Arman Baıanbekov boldy.

– Qala jastarynyń ekologııalyq aksııalarǵa, qaıyrymdylyq is-sharalaryna belsendi qatysatyny qýantady. Búgingi aksııaǵa 100-den astam volonter qatysýǵa nıet bildirdi. Jalpy, «Baıqońyr» aýdanynda tazalyq jumystary, abattandyrý qyzý júrip jatyr. Jyl basynan beri 1 611 aǵash egildi. Onyń ishinde Jumabek Táshenov kóshesiniń boıynda paıda bolǵan jasyl ormandy erekshe aıtýǵa bolady. Atalǵan ýchaskedegi bos keńistikke 500-ge jýyq aǵash egilgen. Osylaısha, qalamyzda taǵy bir ekologııalyq taza, tynysh demalys aımaǵy quryldy. Kógaldandyrý barysynda qylqan japyraqty aǵashtar, alma, almurt aǵashtary, qaraǵaı otyrǵyzyldy. Osy aımaqtardyń barlyǵyn taza ustaýǵa jumylǵan jaýapty mekemege, senbilikke shyǵyp júrgen qala turǵyndaryna alǵys aıtamyz, – deıdi A.Baıanbekov.

Aýdannyń kúl-qoqysyn shyǵa­rýǵa shyqqan belsendi jastar­dyń qatarynda «Shıpager» medısı­na­lyq kolledjiniń stýdenti Alypjan Aıdarov ta bar. Oqýda ozat jas sportpen shuǵyldanady, volonterlikke de ýaqyt tabady.

– Kolledjde feldsher maman­dy­ǵynda oqımyn. Volenterlikpen eki jyldan beri aınalysamyn. Bıyl jyl basynan beri senbilikterden qalmaýǵa tyrysyp, osymen tórtinshi ret aksııaǵa kelip turmyn. Meniń túsinigimde «tazalyq» degen sózdiń aýqymy keń. Ásirese biz sekildi medısına salasynda oqıtyn stýdentter tazalyqty ózinen bastaýy kerek. «Taza Qazaqstan» ekologııalyq aksııa­synda birinshiden, qala tazalyǵyna úles qossaq, ekinshiden, stýdenttik ómirdiń shýaqty kezeńderin kóńildi ótkizip júrmiz. Osylaısha, ýaqytty barynsha tıimdi paıdalansaq deımiz. Volonterlik uıymǵa bárimizdi «jaqsylyq jasaý» degen ortaq maqsat biriktirdi, – deıdi Alypjan.

Osydan bir aı shamasy buryn «Amanat» partııasynyń «Jastar rýhy» jastar qanaty áleýmettik jelidegi paraqshada tazalyqqa úndeıtin baıqaý jarııalaǵan. Onyń sharty boıynsha qala turǵyndary shyny, plastmassa bótelkelerdi jınap, Táýelsizdik, 3 mekenjaıyna ótkizýge tıis boldy. Bótelkelerdi uıymdastyrýshylar qaıta óńdeý polıgonyna tapsyrady. Utysqa qatysýǵa otyzdan astam bótelke alyp kelgen qala turǵyndary boldy. Aksııa barysynda utystyń jeńimpazdary anyqtaldy. Basty syılyq Astana halyqaralyq ýnıversıtetiniń menedjment mamandyǵynda oqıtyn Dılıara Ysqaqovaǵa buıyrdy. Taǵy birneshe stýdentke tamaqtaný ornyna joldama berildi.

– Men ýnıversıtettegi «Qolǵa­­bys» volonterlik uıymynyń múshe­­simin. Volonterlikpen mektep jasynan aınalysamyn. Kóbine qarttarǵa kómektestik. Áleýmettik jelide bótelke jınap, konkýrsqa qatysýǵa bolatyn baıqaý jarııalanǵanyn estip, baǵymdy synap kórsem dedim. Onsyz da volenterlik uıymda taza­lyqqa aralasyp júrmiz. Kórse­tilgen mekenjaıǵa 40 bótelke aparyp tapsyrdym. Apple Watch utyp alamyn dep oılaǵanym joq. Degenmen maǵan buıyrǵanyna qýanyshtymyn. Qala turǵyndaryn, qatarlastarymdy tazalyq saqtaýǵa shaqyramyn, – deıdi D.Ysqaqova.

Bıyl «Baıqońyr» aýdanyndaǵy 17 ýchaskede kógaldandyrý jumysyn jan­dandyrý josparlanǵan. Onyń ishinde 5 000-nan astam aǵash otyrǵyzylady. Sol sekildi 1 079 buta, 16 355 kópjyldyq, 5 795 birjyldyq gúl egiledi. Osylaısha, aýdandy kógaldandyrý jumystaryna jyldaǵydaı kóp kóńil bólingeli tur. «Tazalyq taza jerde emes, tazalyq saqtaǵan jerde bolatynyn» jaqsy biletin elordalyqtar jalpyhalyqtyq senbilikterden qalmaı, jańa keıipke engen aýlalaryn kútip ustaıdy dep senemiz.