Týrızm jáne sport mınıstrligi, Almaty oblystyq dene shynyqtyrý jáne sport basqarmasy, dene shynyqtyrýdy jáne sportty damytý ortalyǵy, Ulttyq sport túrleri qaýymdastyǵy, «Kókpar» respýblıkalyq federasııasynyń uıymdastyrýymen Talǵar aýdanynda kókpardan jastar arasynda HIH el chempıonaty ótti.
«Almaty Horse and Polo Club» at sporty klýbynyń «Aqbulaq» atshabarynda uıymdastyrylǵan jarysqa elimizdiń ár aımaǵynan 16-23 jas aralyǵyndaǵy 156 sportshy qatysty. Jarystyń saltanatty ashylýynda Almaty oblystyq dene shynyqtyrý jáne sport basqarmasy basshysynyń mindetin atqarýshy Rahman Shaharbek kókpardyń tamyryn kóshpeliler dáýirinen tartatyn erekshe sport túri ekenin atap óte kelip: «Elimizde ulttyq sport túrleri qarqyndy damyp keledi. Kókpar – halqymyzdyń murasy, tarıhy, maqtanyshymyz. Bul saıys er minezdi, batyldyqty, komandalyq rýhty qalyptastyrady», dedi.
«Chempıonat ulttyq jastar quramasyna úzdikterdi irikteýge arnalǵan. Kókpar tek dástúr ǵana emes, úlken jeńisterge aparar jarqyn jol ekenin jastar bilýge tıis», dedi respýblıkalyq «Kókpar» federasııasynyń prezıdenti Aıdarbek Qojanazarov. Sondaı-aq ol kókpar lıgasyn qurý, klýbtyq jarys júıesine kóshý arqyly ulttyq sport túrin damytý jańasha sıpat alǵanyn málim etti.
Jarys qorytyndysynda Jambyl oblysynyń kókparshylary jeńimpaz atandy. 2-oryndy Shymkent qalasynyń komandasy ıelendi. Úzdik úshtikti Almaty oblysynyń jastar komandasy túıindedi. Jeńimpazdar men júldegerler kýbok, medal, dıplom, aqshalaı syılyqtarmen marapattaldy. Jalpy júlde qory 12 350 000 teńgeni qurady. Sonymen qatar «Úzdik oıynshy», «Úzdik shabýyldaýshy», «Úzdik balýan», «Úzdik tulpar» atalymdary boıynsha júldegerler anyqtaldy. Jeńimpazdarǵa sport sheberi, júldegerlerge sport sheberligine kandıdat ataǵy berildi.
Almaty oblysy