Jalpyulttyq sosıal-demokratııalyq partııasynyń depýtattary Premer-mınıstr Oljas Bektenovke resmı saýal joldap, monoqalalardyń áleýmettik-ekonomıkalyq jaǵdaıyn jaqsartý úshin júıeli jáne naqty sharalar qabyldaýdy usyndy, dep habarlaıdy Egemen.kz.
JSDP fraksııasynyń depýtattary — A. Rahymjanov, N. Áýesbaev, A. Saǵyndyqova jáne N. Saılaýbaı — Qazaqstandaǵy monoqalalardyń qazirgi jaǵdaıyna alańdaýshylyq bildirip, Premer-mınıstr Oljas Bektenovke depýtattyq saýal joldady. Olar sońǵy onjyldyqta eldegi monoqalalar sany 27-den 20-ǵa deıin qysqarǵanyn, keıbir qalalar óz ekonomıkalaryn ártaraptandyrý arqyly tizimnen shyqsa, Arqalyq pen Serebrıansk sekildi qalalarda qala quraýshy kásiporyndardyń jabylýy saldarynan mártebesin joǵaltqanyn atap ótti.
Depýtattardyń málimetinshe, monoqalalardyń 15-i shıkizattyq baǵytta jumys isteıdi. Tereń óńdeý salasy áli damymaı otyr. Monoqalalardaǵy 14 myńnan astam kásiporyn 2023 jyly 18,5 trln teńge kóleminde ónim óndirgenimen, bul kórsetkish turǵyndardyń ómir sapasyna oń áser etpeı otyr. Kerisinshe, jyl saıyn halyq sany azaıyp, ásirese jastar kóbirek ketip jatyr.
JSDP Shyǵys Qazaqstandaǵy Altaı, Serebrıansk jáne Rıdder qalalaryndaǵy áleýmettik jaǵdaıǵa erekshe toqtalyp, bul qalalarda bilim berý men densaýlyq saqtaý mekemelerinde kadr tapshylyǵy óte joǵary ekenin kórsetti. Depýtattar «Dıplommen – aýylǵa» baǵdarlamasyn monoqalalarǵa da engizý qajettigin aıtty, sebebi bul qalalar halyq sany men ómir súrý jaǵdaılary jaǵynan aýyldardan artyq emes.
Fraksııa ókilderi sonymen qatar monoqalalarda kásibı daıarlaý men qaıta daıarlaý baǵdarlamalaryn qaıta qarap, shaǵyn jáne orta bıznesti qoldaýdy kúsheıtý, ár qalanyń damý strategııasyn ázirleý jáne fermerlik sharýashylyqtardy nesıelendirýdi usyndy. Sonymen birge, monoqalalardyń oń ınvestısııalyq ımıdjin qalyptastyrý maqsatynda ulttyq aqparattyq naýqan uıymdastyrý qajettigin de atap ótti.
«Biz Úkimetten deklaratıvti ýádelerdi emes, naqty, júıeli jáne qoǵamdyq qadamdardy kútemiz. Monoqalalardyń máselesi – ulttyq turaqtylyq pen áleýmettik ádilettiliktiń mańyzdy bóligi. Jalpyulttyq sosıal-demokratııalyq partııa fraksııasynyń depýtattary jaýapty zańda belgilengen merzimde jazbasha túrde berýińizdi suraı otyryp, monoqalalar máselesin sheshýde naqty jáne júıeli sharalar qabyldaýdy talap etedi», delingen depýtattyq saýalda.
Janel TО́LEÝBEKOVA, EUÝ stýdenti