Búgin Qytaıdyń Sıan qalasynan Almaty baǵytyna qaraı alǵashqy halyqaralyq týrıstik poıyz saparǵa shyqty. Saltanatty attandyrý rásimine «Qazaqstan Temir Joly» UK» AQ Basqarma tóraǵasynyń orynbasary Ánýar Ahmetjanov bastaǵan qazaqstandyq delegasııa men Qytaı tarapynan memlekettik qurylymdar, jergilikti basqarý organdary jáne týrızm men kólik salasynyń ókilderi qatysty, dep habarlaıdy Egemen.kz.
Bul bastama eki el arasyndaǵy mádenı áriptestikti tereńdetýge jáne týrızm baǵytynda ózara is-qımyldy nyǵaıtýǵa baǵyttalǵanyn atap ótti. Ánýar Ahmetjanovtyń aıtýynsha, sapar barysynda Qytaıdan kelgen meımandar Qazaqstannyń tarıhı-mádenı baı murasymen jaqynyraq tanysyp, bolashaqtaǵy birlesken jobalarǵa negiz qalanýy múmkin.
Poıyz Úrimji qalasy arqyly ótip, halyqaralyq shekaralyq Qorǵas ótkelinde aıaldaıdy. Munda dóńgelek juptary aýystyrylyp, poıyz Altynkól stansııasy arqyly Almatyǵa baǵyt alady.
Quramynda 9 vagony bar bul poıyz jolaýshylar úshin jaıly ári zamanaýı talaptarǵa saı jabdyqtalǵan. Týrıstik topqa bıznes qaýymdastyǵynyń ókilderi, ǵylym, sport jáne óner salalarynan 246 adam engen.
Almatyda qonaqtar bes kún boıy qalanyń tarıhı jáne mádenı nysandarymen tanysyp, negizgi týrıstik oryndarǵa barady. Sonymen qatar, qabyldaýshy tarap uıymdastyrǵan mádenı jáne iskerlik sharalarǵa qatysady.
Damıra TО́LEGEN
EUÝ stýdenti