Amankeldi aýdanynda «Qazaq aýyly» dep atalatyn máde-nı-tanymdyq joba bastaldy. «Adal azamat» birtutas tárbıe baǵdarlamasy aıasynda iske qosylǵan jańa joba qazaqtyń kóneden úzilmeı jetken salt-dástúrin, ulttyq dúnıetanymyn dáripteýdi kózdeıdi.
«Qazaq aýylynyń» ashylý rásimi Amankeldi kentiniń irgesindegi «Táj-Torǵaı» týrıstik kesheninde ótti. Saltanatty is-sharaǵa jergilikti turǵyndar, muǵalimder, oqýshylar, alys-jaqynnan kelgen meımandar qatysty.
Kópshilik 50 qobyzshy men 50 dombyrashy qosylyp oryndaǵan kúı sherýin tamsana tyńdap, ónerpazdarǵa qoshemet kórsetti.
Joba avtorlarynyń aıtýynsha, munda balalar men jasóspirimder asyq atyp, atqa minip, taı úıretýge jattyǵady. Ustalyqqa, qolónerge úırenedi. Qyz balalar jún tútip, jip ıirip, quraq qurap, kúbi pisip, maı shaıqap, qurt syǵyp neshe túrli ulttyq taǵamdardy ázirleýge mashyqtanady.
Jergilikti turǵyndardyń úlken merekesine aınalǵan is-shara barysynda aq shańqan kıiz úıler boı túzep, etnografııalyq jádigerlerdiń kórmesi ashyldy. Úlken-kishi qosylyp asyq atyp oınady.
Aýyl irgesindegi merekege talaı jyldan beri osy «Táj-Torǵaı» týrıstik keshenin bastan-aıaq salyp bitiremin dep shapqylap júrgen belgili mesenat Sapar Ysqaqov aǵamyz da arnaıy kelipti.
«Qazaqtyń baı rýhanı murasyn urpaq jadynda saqtap qalýdyń bir joly – osyndaı jobalar. Aýyldyń bolmysyn, salttyń sánin kózimen kórgen bala – el men jerdiń qadirin biletin azamat bolyp ósedi», deıdi Sapar Ysqaquly.
Qostanaı oblysy