«eGov Mobile» qosymshasynda úı janýaryna arnalǵan sıfrlyq pasport qyzmeti iske qosyldy. Bul qujat úı janýarlaryn esepke alý Biryńǵaı derekter bazasymen baılanysty jumys isteıdi.
Sıfrlyq tólqujat veterınarlyq klınıkaǵa barǵanda, saıahat kezinde, kórmege qatysqanda nemese janýaryńyz joǵalǵan jaǵdaıda jedel aqparat usynýǵa óte yńǵaıly bolmaq. Sonymen qatar bul júıe qańǵybas janýarlar sanyn azaıtýǵa jáne ıeleriniń jaýapkershiligin arttyrýǵa kómektesedi. Naýryz aıyndaǵy málimet boıynsha júıede 224 myńnan astam úı janýary tirkelgen, onyń ishinde 20 myńnan astamy – ıesiz janýarlar.
Sıfrlyq pasportta birneshe málimet qamtylady. Atap aıtsaq, janýardyń jeke nómiri, aty, túsi, tuqymy, týǵan kúni, erekshe belgileri, janýardyń túri men jynysy, tirkelgen ári naqty turatyn mekenjaıy, ıesiniń tolyq aty-jóni men JSN, sondaı-aq chıpteý, sterılızasııa, vaksınasııa týraly aqparattar sıfrlyq pasportta tolyq jazýly turady.
Qyzmetti paıdalaný úshin eń áýeli «eGov Mobile» qosymshasyna kirip, avtorızasııadan ótý qajet. Sodan soń «Sıfrlyq qujattar» servısin ashyp, «Basqa qujattar» bóliminen janýardyń pasportyn tabýyńyz kerek. Eger qujat kórinbese, «Qujattardy jańartý» batyrmasyn basyńyz.
Jańa servıs Sıfrlyq damý, ınnovasııalar jáne aeroǵarysh ónerkásibi mınıstrliginiń bastamasymen, «Ulttyq aqparattyq tehnologııalar» AQ jáne Ekologııa mınıstrligimen birlese otyryp iske qosylǵan.