Rámizder kúni qarsańynda Qostanaı turǵyndary Eltańba avtory, Qazaqstannyń eńbek sińirgen qaıratkeri Jandarbek Málibekovpen kezdesti.
Kórnekti sáýletshi aldymen Shyraqbek Qabylbaev atyndaǵy Qostanaı akademııasynyń kýrsanttarymen júzdesti. Akademııa ujymy alańǵa sap túzep, Memlekettik rámizderge qurmet rásimin ótkizdi. Saltanatty jıynda akademııa bastyǵy, polısııa general-maıory Aqynqalı Dármenov sóz sóılep, qadirli meımanǵa oqý orny ujymynyń atynan alǵys aıtty.
«Búgin – biz úshin aıryqsha kún. Memlekettik eltańbanyń avtory Jandarbek Málibekulyn akademııa qabyrǵasynda qarsy alyp, qurmet kórsetý – biz úshin úlken mártebe. Sizdiń qolyńyzdan shyqqan Eltańba – el tarıhy men rýhanııatynyń, ultymyzdyń mádenıeti men bolmysynyń aıshyqty beınesi. Bul – egemendigimizdiń, birligimiz ben aıbynymyzdyń nyshany. Sizdiń osy baǵyttaǵy eńbegińiz – urpaqqa úlgi bolarlyq baǵa jetpes mura», dedi akademııa bastyǵy.
Jandarbek Málibekov kýrsanttarǵa Eltańbanyń ıdeıalyq mazmuny, tarıhı tamyry men kórkemdik ereksheligi jaıynda áńgimelep berdi.
«Elimizdiń erteńi, bolashaqtyń kilti osynda sap túzep turǵan jas sarbazdardyń qolynda. Sizderge osyny jete túsinip, sapaly bilim alyp, bolashaqta elge adal qyzmet etý – paryz. Ata-babamyz ańsaǵan, Alash arystary armandaǵan táýelsizdigimiz máńgi jasasyn! О́ńirlerińiz órkendep, elimiz gúldene bersin. Ol úshin jastar bilimdi, sanaly, eljandy bolýy qajet. Bilim men eńbek jolynda aıanbaı ter tógip, el múddesi úshin qyzmet etińizder», dedi J.Málibekov.
Eltańba avtory odan keıin Ybyraı Altynsarın atyndaǵy mýzeıge baryp, jergilikti zııaly qaýym ókilderimen kezdesti. Basqosýda Eltańbanyń jasalý tarıhy, ulttyq sáýlet óneri týraly áńgime boldy. Qadirli meıman Alash balasy úshin qasterli dúnıege aınalǵan Eltańba bederinde kórinis tapqan nyshandarǵa toqtalyp, ár belginiń nendeı maǵyna beretinin aıtyp berdi.
Kesh sońynda Jandarbek Málibekov Ybyraı Altynsarın mýzeıine «Qazaqstan Eltańbasy» kitaby men Eltańba tósbelgisin tartý etti.
Eltańba avtory kelesi kúni memlekettik qyzmetshilerge rámizderdi durys paıdalaný, ornatý, ornalastyrý tártibi jóninde semınar ótkizdi. Is-shara barysynda memlekettik rámizderdiń shyǵý tarıhy, qazirgi qoldanystaǵy jaǵdaıy, memlekettik rámizderdi jasap shyǵaratyn kásiporyndardyń jumys sapasyn baqylaý máseleleri talqylandy.
«Memlekettik rámizderdi daıyndaýda sapa men barlyq talaptyń saqtalýyna erekshe kóńil bólemiz. Eń bastysy, tapsyrys berýshi tehnıkalyq sıpattamany durys toltyryp jiberýi qajet. О́ıtkeni keıde durys toltyrylmaǵan qujattardyń saldarynan bizdiń atymyzǵa jaǵymsyz pikirler aıtylyp qalyp jatady. Biz jumysymyzdy sol qujat negizinde ǵana júrgizemiz jáne oǵan eshqandaı ózgertýler engizbeımiz. Qazirgi tehnologııalar óte damyǵan, avtomattandyrylǵan qurylǵylarmen jumys isteımiz. Bul bizge ónimniń sapasyn joǵary deńgeıde qamtamasyz etýge múmkindik beredi», dedi memlekettik rámizderdi daıyndap shyǵaratyn jeke kásipker Jandos Tynymbaev.
Semınarǵa qatysýshylardyń aıtýynsha, Tehnıkalyq retteý jáne metrologııa komıteti memlekettik rámizderge qatysty memlekettik baqylaýdy turaqty júrgizedi. Qandaı da bir kemshilik anyqtalsa, tıisti túzetý engizý úshin eskertpe beriledi.
«Jyl saıyn belgilengen kestege saı rámizderdi qoldaný boıynsha standarttardy túsindirý jáne monıtorıng júrgizý jumystaryn júzege asyramyz. Bizdiń mekemede 988 standart bekitilgen. О́ndirýshilerdiń tehnıkalyq jabdyǵynyń bolýy, lısenzııalarynyń bar-joǵy tekseriledi. Sonymen qatar syzyqtar men ólshemderge, túsi men sapasyna qoıylatyn talaptar qatań baqylanady. Memlekettik eltańbanyń sapasyna jaýapkershilikpen qosa, standart talaptaryn da óndirýshiler saqtaýǵa mindetti», deıdi Tehnıkalyq retteý jáne metrologııa komıteti Qostanaı oblystyq departamentiniń basshysy Nurgúl Shodorova.
Semınar barysynda memlekettik rámizder zań belgilegen talapqa sáıkes kelmese, 20 AEK-ten 900 AEK-ke deıin aıyppul salynatyny aıtyldy. Alaıda soǵan qaramastan, atalǵan talapty áli de saqtaı bermeıtin mekemeler kezdesip qalyp jatady. Sondyqtan jıynǵa qatysýshylar memlekettik rámizderge qatysty birkelki talaptardy qamtıtyn jadynama shyǵarý kerek degen uıǵarymǵa keldi.
Kezdesý sońynda oblys ákiminiń orynbasary Baqytjan Narymbetov Eltańba avtoryna búkil oblys turǵyndarynyń alǵysyn jetkizip, mundaı taǵylymdy is-sharalardyń kópshiliktiń kókeıine Otanǵa degen súıispenshilik, memleketshildik rýhyn ornyqtyratynyn aıtty.
Qostanaı oblysy