Qazaqstan, Ázerbaıjan, Qyrǵyzstan, О́zbekstan jáne Soltústik Kıpr Túrik Respýblıkasy parlamentteriniń spıkerleri Ulttyq ǵarysh ortalyǵyna baryp, ǵarysh apparattaryn qurastyrý-synaý kesheniniń jumysymen tanystydep jazady Egemen.kz.
Túrki memleketteri Parlamenttik Assambleıasynyń HIV jalpy otyrysy qarsańynda Qazaqstan Parlamenti Májilisiniń tóraǵasy Erlan Qoshanov, Ázerbaıjan Respýblıkasy Mıllı Medjlısiniń tóraıymy Sagıba Gafarova, Qyrǵyz Respýblıkasy Jogorký Keneshiniń tóraǵasy Nýrlanbek Týrgýnbek ýýlý, О́zbekstan Respýblıkasy Olıı Majlısiniń Zań shyǵarýshy palatasynyń spıkeri Nýrıddın Ismoılov jáne Soltústik Kıpr Túrik Respýblıkasy Parlamentiniń tóraǵasy Zııa О́ztúrkler «Qazaqstan Ǵarysh Sapary» UK» AQ Ulttyq ǵarysh ortalyǵyna bardy.
Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev pen Ortalyq basshylyǵy qonaqtarǵa ǵarysh apparattaryn qurastyrý-synaý kesheniniń jumysyn kórsetip, Qazaqstandaǵy aeroǵarysh salasynyń bolashaǵy týraly aıtyp berdi. Ortalyq Azııada balamasy joq bul keshen 100 kg-nan 6 tonnaǵa deıingi salmaqtaǵy ǵarysh apparattaryn qurastyrýǵa, ushý aldyndaǵy daıyndyqqa jáne tolyq synaq sıklynan ótkizýge arnalǵan. Ortalyq bazasynda otandyq mamandar joǵary dáldikti jabdyqtardy paıdalana otyryp, ǵarysh apparattarynyń komponentteri men basqa salalarǵa arnalǵan qosalqy bólshekterdi daıyndaıdy. Sonyń ishinde eksportqa da ázirleıdi.
Parlament spıkerlerine brıtandyq kompanııamen birlesip jasalǵan KazSTSat ǵylymı jer seriginiń maketi kórsetildi. Mundaı tıptegi alǵashqy jer serigi 2018 jyly ushyrylǵan bolatyn. Ol ǵaryshtyq monıtorıng júrgizip, aýyl sharýashylyǵy, sý resýrstaryn qorǵaý jáne tıimdi paıdalaný, tótenshe jaǵdaılar salasy, tabıǵı apattardy boljaý sııaqty jáne basqa da mindetterdi tıimdi sheship keledi. Qazirgi ýaqytta 5 jer seriginen turatyn toptamany qurý jumystary júrgizilýde. Barlyq jumysty 2028 jylǵa deıin aıaqtaý josparlanyp otyr.
Mońǵolııa men Kongo úshin KazSTSat tıpi boıynsha spýtnıkterdi ázirleý jóninde ýaǵdalastyqtarǵa qol jetkizildi. Aldaǵy ýaqytta osy elderdiń jáne otandyq jer serikteriniń arasynda aqparat almasý qamtamasyz etiledi. Bul halyqaralyq jer serikteri toptamasyn qurýǵa jáne ǵaryshtyq monıtorıngtiń tıimdiligin arttyrýǵa múmkindik beredi.
Sondaı-aq qonaqtarǵa OTS-Sat nanosanatty ǵylymı ǵarysh apparatynyń jasalýyna qatysty ázirlemeler tanystyryldy. Bul Túrki memleketteri uıymyna múshe elderdiń birlesken jobasy. Qazirgi ýaqytta apparat pen onyń qosalqy júıeleriniń jobalanýy aıaqtalyp, komponentterdi satyp alý jáne qosalqy júıelerdi jınaý jumystary júrgizilýde. Optıkalyq paıdaly júktemeni jasaý jáne ony synaqtan ótkizý aıaqtaldy.
Sonymen qatar Qazaqstannyń Halyq qaharmany, ǵaryshker Aıdyn Aıymbetov Parlament spıkerlerine «Baıqońyr» ǵarysh aılaǵynda Reseımen birlesip júzege asyrylyp jatqan «Báıterek» ǵarysh-zymyran kesheni týraly aıtyp berdi. Bul joba Qazaqstanǵa ǵarysh apparattaryn jasaýdan bastap olardy ushyrýǵa deıingi tolyq sıkldi qamtıtyn, tıimdi kommersııalyq qurylymy bar tolyqqandy ǵarysh salasyn qalyptastyrýǵa múmkindik beredi. Alǵashqy synaqtyq ushyrý bıylǵy jyldyń sońyna josparlanǵan. «Baıqońyr» ǵarysh aılaǵynda ǵaryshtyq týrızmdi uıymdastyrý, startaptar men ǵylymı jáne óndiristik jobalar úshin ınfraqurylym qurý sııaqty basqa da birlesken bastamalar júzege asyrylýda.
11-12 maýsym kúnderi Astanada TúrikPA-nyń Parlamenttik dıplomatııa róline arnalǵan XIV jalpy otyrysy ótýde. Otyrystyń kún tártibinde parlamenttik uıymǵa múshe memleketter arasyndaǵy saýda-ekonomıkalyq, mádenı-gýmanıtarlyq yntymaqtastyqty nyǵaıtý, sondaı-aq sıfrlandyrý, ǵylym, ekologııa jáne densaýlyq saqtaý baǵyttaryndaǵy ózara is-áreketti damytý máseleleri qarastyrylýda.