Shelek polıtehnıkalyq kolledjinde jyl saıyn 6 mamandyq boıynsha 400-den asa stýdent bilim alady. Bıylǵy Jumysshy mamandyqtar jylyna oraı kolledj stýdentteri men ustazdary mamandyqtaryn maqtan etken sherý uıymdastyrdy. Bul ıgi sharaǵa eńbektiń qara naryna aınalǵan aǵa býyn ókilderi qatysyp, taǵylymǵa toly tájirıbelerimen bólisti.
70 jyldyq tarıhy bar kolledjden bastaý alǵan saptyq sherýde tehnıka tizgindegen stýdentter men oqytýshylar kósh bastap, aýyldyq ákimdiktiń alańyna deıingi kóshelermen júrip ótti. Ondaǵy maqsat – kásiptik mamandyqqa degen qoǵamnyń oń kózqarasyn qalyptastyryp, mártebesin ósirý. Sonymen qatar is-shara barysynda arnaıy mamandyqtar kórmesi uıymdastyrylyp, kásiptik salanyń qyr-syryna qanyqtyrdy.
«Eńbekpen tapqan nan tátti. Prezıdentimiz Qasym-Jomart Toqaevtyń osy jyldy «Jumysshy mamandyqtar jyly» dep jarııalaýy eńbek adamynyń bedelimen qatar, qulshynysyn arttyryp otyr. Búginde dánekerleýshi men santehnık, elektrık pen traktorshylarǵa suranys joǵary. Úıimizde sý jarylyp, jaryq sónse, osy mamandardy shammen izdep ketemiz. Sondyqtan jastarǵa jol siltep, mamandyq tańdaýyna baǵyt-baǵdar berip otyrǵan kolledj ujymyna alǵysymyz zor», deıdi Shelek aýyldyq ardagerler keńesiniń tóraǵasy Ábilbek Aıtaqynov.
Strategııalyq baǵyt-baǵdarynda belgilengen «Worldskills» standarttary boıynsha bilim berý baǵdarlamalaryn engizý, áleýmettik áriptestikti keńeıtý, oqý úrdisiniń traektorııasyn qalyptastyrý boıynsha jumys berýshilermen tyǵyz qarym-qatynas ornatý, oqytýshylar men óndiristik oqytý sheberleriniń biliktiligin arttyrý, sondaı-aq oqý-tárbıe úrdisin sıfrlandyrý syndy birqatar ıgi bastama jolǵa qoıylyp, onyń alǵashqy jetistikteri de jarqyraı kórine bastaǵan.
«Kolledj stýdentteri óndiristik tájirıbeden ótip, odan ári jumysqa ornalasýyn qamtamasyz etý úshin birqatar eńbek ujymdarymen, atap aıtsaq, «Qazposhta», «Qazaqtelekom», «Orman sharýashylyǵy» syndy iri mekemelermen qatar, basqa da sharýa qojalyqtarymen, jeke kásip ıelerimen áleýmettik seriktestikti arttyryp kelemiz. Bıyl áleýmettik seriktestikter sany 33-ke jetti. Sonyń ishinde «Jetisý volfram» zaýyty bar. Eki jyldan beri stýdentterdiń 30 paıyzy, ıaǵnı gazelektrdánekerleýshi, elektrmonteri, traktorıst-mashınıst syndy mamandyqty meńgerýshi stýdentter óndiristik tájirıbeden ótedi. Stýdentterimiz «Worldskills-2025» aımaqtyq chempıonatyna qatysyp, bes júldeli oryndy jeńip aldy. Bul – úlken jetistik», – degen kolledj dırektory Qýat Qurmanǵalıuly saltanatty is-shara aıasynda birqatar mekemeler basshylarymen ózara yntymaqtastyq týraly memorandýmǵa qol qoıdy.
Aıta keterligi, 2021 jyly kúrdeli jóndeýden ótken kolledjde ınfraqurylym tolyqtaı jańarǵan. 240 oryndyq jataqhana jarqyraı jasalǵan. Aýmaǵy tolyqtaı abattandyrylyp, kóz tartarlyq keıipke engen. Buǵan qosa, kolledjdiń materıaldyq-tehnıkalyq bazasy nyǵaıǵan, 2 oqý korpýsy, 21 oqý kabıneti, 6 zerthana, 4 sheberhana, 2 kompıýterlik kabınet, 7 ınteraktıvti taqta, 30 oryndyq kitaphana jabdyqtalyp, zamanaýı aýdıo-beıne quraldar ornatylǵan. Sol jyly «Jas maman» jobasy sheńberinde «Avtomobıl kóligine tehnıkalyq qyzmet kórsetý, jóndeý jáne paıdalaný» mamandyǵy boıynsha 277 mln teńgege jýyq somaǵa zamanaýı jabdyqtar jetkizilip ornatylǵanyn ataý artyq etpes. Nátıjesinde, eýropalyq zamanaýı jabdyqtar tolyq qoldanysqa engeli beri stýdentterdiń tehnıka jóndeýge qyzyǵýshylyǵy artyp, kez kelgen avtokólik bólshekterin qurastyrý men jasaýdaǵy sheberlikteri shyńdalǵan.
Jeri qunarly Eńbekshiqazaq aýdany agroónerkásip qarqyndy damyǵan. Osyǵan oraı, atalǵan bilim mekemesi aldaǵy ýaqytta aýyl sharýashylyǵyna qatysty jańa mamandyqtar ashyp, bilikti jumysshylar qataryn kóbeıtýge nıetti.
Almaty oblysy