Parıj qalasynyń XVI okrýgi merııasynda qazaqtyń uly aqyny jáne oıshyly Abaı Qunanbaıulynyń 180 jyldyq mereıtoıyna arnalǵan dóńgelek ústel ótti. Is-sharany Qazaqstannyń Fransııadaǵy Elshiligi men «Abaı» mádenı ortalyǵy birlese uıymdastyrdy, dep habarlaıdy Egemen.kz.
Jıynǵa Qazaqstannyń Renn qalasyndaǵy Qurmetti konsýly Jannar Avar-Týrebaeva, Fransııanyń Eýropa jáne syrtqy ister mınıstrligi, bilim jáne mádenıet mekemeleriniń ókilderi, qazaq dıasporasynyń músheleri, sondaı-aq 2020 jyly «Abaı» kitabynyń jaryq kórýine atsalysqan fransýz azamattary qatysty.
Qazaqstannyń Fransııadaǵy Elshisi Gúlsara Arystanqulova óz sózinde Abaı murasynyń qazaq halqynyń rýhanı baılyǵynyń tuǵyry ekenin erekshe atap ótti. Sonymen qatar, Elshi fransýz tarapyna Abaıdy ulyqtaýǵa kórsetken qoldaýy úshin, atap aıtqanda Parıjdiń XVI okrýgindegi Aqyndar alańynda Abaı #bıýstiniń ornatylýyna yqpal etkeni úshin rızashylyǵyn bildirdi. Ol Abaı shyǵarmashylyǵyndaǵy gýmanızm men fılosofııalyq tereńdik halyqtar arasyndaǵy rýhanı kópirge aınalyp, Qazaqstan men Fransııa arasyndaǵy mádenı baılanystardy nyǵaıta túsetinin aıtty.
О́z kezeginde, Fransııanyń Akademııalyq palmalar ordeniniń ıegeri, Qazaqstan Respýblıkasynyń Beıbitshilik jáne rýhanı kelisim syılyǵynyń laýreaty, professor Alber Fıshler Abaıdyń ıdeıalary qazirgi zaman úshin asa ózekti ekenin aıtyp, onyń poezııasy men fılosofııasynyń ámbebap qundylyqtarmen úndesetinin atap ótti.Abaı poemalary men Qara sózderin fransýz tiline aýdarǵan Krıstın Zeýtýnıan-Belýs dóńgelek ústel aıasynda aýdarmashylyq barysyndaǵy oı-pikirlerin bildirip, uly aqynnyń birneshe óleńin naqyshyna keltire oqyp berdi.Shara barysynda qatysýshylar Abaı Qunanbaıulynyń shyǵarmalaryn qazaq jáne fransýz tilderinde oqyp, uly oıshyldyń máńgilik murasyn dáriptedi. Kesh sońynda arnaıy kelgen ánshi Assem Muze mýzykanttarmen birge Abaıdyń #ánderin qazaq jáne fransýz tilderinde oryndap, kórermenderge erekshe áser qaldyrdy.
Aıta ketý kerek, qazirgi tańda Fransııada Abaı Qunanbaıulynyń eki bıýsti ornatylǵan: alǵashqysy — 2016 jyly #Renn qalasynda, al ekinshisi — 2020 jyly Parıjde ashyldy. Jyl saıyn osy músinder mańynda qazaqstandyqtar men fransýzdar jınalyp, uly oıshyldyń rýhyna taǵzym etip, Abaı murasyn ulyqtaıdy.