Eksporttyq akselerasııa baǵdarlamasy 2020 jyldan 2024 jylǵa deıingi alǵashqy bes jylda iske asyrylyp, shıkizattyq emes sektordaǵy 557 qazaqstandyq kásiporynǵa syrtqy naryqtarǵa shyǵýǵa qoldaý kórsetti. 2025 jyly baǵdarlama aýqymyn keńeıtip, skorıngtik model arqyly irikteýden ótken óńdeý ónerkásibi men qyzmet kórsetýshi sektordaǵy taǵy 120 kásiporyndy qamtydy, dep jazady Egemen.kz.
«Qazaqstan eksportynyń kólemi 3,1%-ǵa artyp, 80 mlrd AQSh dollarynan asty. Onyń ishinde óńdelgen ónim eksporty 28,8 mlrd dollarǵa jetti. Osy kezeńde qyzmetter eksportynyń kólemi de 10,8%-ǵa ósip, 11,8 mlrd dollardy qurady. Bul jaı ǵana sandar emes. Bul – ónimimiz ben ıdeıamyzdy halyqaralyq deńgeıde ilgeriletip jatqan myńdaǵan kásipkerdiń eńbeginiń nátıjesi. Bul – qazaqstandyq ónimder men qyzmetterdiń halyqaralyq naryqta suranysqa ıe ekeniniń dáleli», – dedi QR Saýda jáne ıntegrasııa vıse-mınıstri Aset Nýsýpov Eksporttaýshylar forýmynda.
Memleket basshysynyń tapsyrmasymen qolǵa alynǵan jáne QR Saýda jáne ıntegrasııa mınıstrligi men «QazTrade» AQ birlesip iske asyryp otyrǵan Eksporttyq akselerasııa baǵdarlamasy eksportqa baǵyttalǵan bıznesti qoldaýdyń jáne otandyq ónimderdi sheteldik naryqtarǵa ilgeriletýdiń negizgi quralyna aınaldy. 2024 jyldyń ózinde baǵdarlamanyń 47 qatysýshy kompanııasy eksportqa shyqty nemese syrtqy saýda kelisimsharttaryn jasasty, taǵy 18-i kelisimder satysynda, al 46 kompanııa áleýetti sheteldik seriktestermen kelissózder júrgizip jatyr.
Baǵdarlama tegin negizde júzege asyrylady jáne eksporttyq áleýetti baǵalaýdan bastap naqty naryqtarǵa shyǵý, kelissóz júrgizý jáne eksporttyq kelisimsharttar jasasýǵa deıin keshendi qoldaý usynady. 2025 jyly 18 aqpan men 31 naýryz aralyǵynda ótinimderdi qabyldaý kezeńinde elimizdiń barlyq óńirlerin qamtyǵan 33 túsindirý sharasy – Road show formatynda ótkizildi. 800-den astam kompanııa aqparattandyrylyp, 1200-den astam óndirýshige shaqyrý joldandy. Nátıjesinde 264 ótinim kelip tústi, onyń ishinde 52-si – qyzmet jetkizýshilerden. Verıfıkasııa aıaqtalǵan soń, kásiporyndar basym naryqtarǵa bólindi: Reseı, Qytaı, BAÁ, О́zbekstan, Saýd Arabııasy, Italııa jáne Pákistan.
2025 jyldyń maýsym aıynan bastap oqý baǵdarlamasy bastaldy, sonymen qatar sheteldik satyp alýshylardy izdeý jáne qatysýshylarǵa keńes berý jumystary qatar júrgizilýde. Árbir el boıynsha syrtqy naryqqa shyǵý úderisine súıemeldeý júrgizetin halyqaralyq sarapshylar bekitildi. Irikteý nátıjesinde 120 negizgi qatysýshy jáne 20 rezervtegi kompanııadan turatyn pýl jasaqtalyp, olarmen jeke kelisimsharttar jasalatyn bolady.
Salalyq qaýymdastyqtarmen yntymaqtastyq aıasynda júıeli kedergilerdi joıýǵa erekshe nazar aýdarylýda. 2020–2025 jyldar aralyǵynda baǵdarlama turaqty nátıjelilik kórsetip otyr: qatysýshylar qatarynda tamaq, jeńil, hımııa, mashına jasaý ónerkásibi jáne qyzmet kórsetý sektorynyń kásiporyndary bar. 2020 jyly baǵdarlama tek Qytaı baǵytyna baǵyttalsa, 2025 jyly maqsatty naryqtar geografııasy on bir elge deıin keńeıdi. Olardyń qatarynda Taıaý Shyǵys, TMD, Eýropa jáne Azııanyń negizgi naryqtary bar.
Eksporttyq akselerasııa baǵdarlamasy qazaqstandyq shıkizattyq emes eksportty ilgeriletýdiń naqty tetigi bola otyryp, kásipkerlerge oqyp-úırený, daıyndalý ǵana emes, halyqaralyq seriktestermen naqty kelisimsharttar jasaý múmkindigin de usynyp otyr.