Elordadaǵy Ulttyq mýzeıde Qazaqstandaǵy Qytaı Halyq Respýblıkasynyń týrızm jyly jáne «Jibek pen Jibek joly: Qytaıdan Qazaqstanǵa» atty kórmeniń saltanatty ashylý rásimi ótti. Is-sharaǵa Týrızm jáne sport mınıstri Erbol Myrzabosynov, Qytaı Halyq Respýblıkasynyń Mádenıet jáne týrızm mınıstri Sýn Elı, QR Ulttyq mýzeıiniń dırektory Berik Ábdiǵalıuly, Qytaıdyń Ulttyq jibek mýzeıi dırektorynyń orynbasary Chjan Chenmın jáne ózge de mártebeli meımandar qatysty, dep jazady Egemen.kz.
Erbol Myrzabosynov Qytaı men Qazaqstannyń kez kelgen salada baılanysy bekem, dostyǵy berik elder ekenin atap ótti. Sondaı-aq mınıstr búginde eki el arasyndaǵy qatynastar «Bir beldeý. Bir jol» bastamasy aıasynda jańa deńgeıge kóterilip jatqanyn, bul rette týrızm salasy qos halyqty jaqyndastyratyn negizgi faktorǵa aınalǵanyn jetkizdi.
«Barshańyzdy Qazaqstandaǵy Qytaı týrızmi jylynyń ashylýymen shyn júrekten quttyqtaımyn! Byltyr Astanada Qazaqstan Respýblıkasynyń Prezıdenti Qasym-Jomart Toqaev pen Qytaı Halyq Respýblıkasynyń Tóraǵasy Sı Szınpın 2025 jyldy «Qazaqstandaǵy Qytaı týrızmi jyly» dep jarııalady. Bul 2024 jylǵy «Qytaıdaǵy Qazaqstan týrızmi jylynyń» zańdy jalǵasy sanalady. Aýqymdy is-shara eki el arasyndaǵy týrıstik yntymaqtastyqtyń jańa paraǵyn ashyp otyr. Osy oraıda, memleketter arasyndaǵy týrıstik jáne mádenı almasýdy damytýǵa zor úles qosqan áriptesim – Sýn Elı myrzaǵa erekshe alǵys bildiremin», dedi Týrızm jáne sport mınıstri.Sondaı-aq Erbol Myrzabosynov Qazaqstandaǵy Qytaı Halyq Respýblıkasynyń týrızm jyly aıasynda eki el arasyndaǵy týrıstik bastamalardy qoldaý maqsatynda birqatar sharalardy usyndy.
Atap aıtqanda, elimizde Qytaı týrısterine qolaıly jaǵdaı jasaýǵa múmkindik beretin Welcome Chinese baǵdarlamasyn engizý. Baǵdarlama qonaq úılerdiń, týrıstik kompanııalar men nysandardyń Qytaıdan keletin qonaqtardyń qajettiligine beıimdelýge kómektesedi. Budan bólek, týrızm, sport jáne mádenıetti toǵystyratyn biregeı shekaralyq marafon uıymdastyrý jáne týrıstik joǵary oqý oryndary arasyndaǵy akademııalyq utqyrlyqty arttyrý arqyly bilim men tájirıbe almasý usynyldy.
Sonymen byltyrǵy jyl Qazaqstan men Qytaı úshin týrızmdi ózara damytýda mańyzdy kezeń boldy. 2024 jyl «Qytaıdaǵy Qazaqstan týrızmi jyly» aıasynda Qytaıdyń iri qalalarynda 37 is-shara uıymdastyryldy. Sonyń nátıjesinde týrıster aǵyny birneshe ese artty. Byltyr elimizge Qytaıdan 655 myń týrıst keldi. Bul 2023 jylǵy kórsetkishten 78% joǵary (2023 jyly – 367 myń adam).