О́tken jyly Qazaqstan men Qytaıdyń týrızm salasyndaǵy yntymaqtastyǵy jańa deńgeıge kóterildi. Otandyq týrızmniń Qytaıdaǵy jyly tek rámizdik bastama emes, eki el arasyndaǵy gýmanıtarlyq jáne ekonomıkalyq baılanysty nyǵaıtýdyń naqty quralyna aınaldy. Bul kezeńde mádenı dıplomatııa, óńirlik birlesken kúsh-jiger negizinde aýqymdy jumys júrgizildi.
Jyl boıy Beıjiń, Shanhaı, Sıan, Úrimshi, Gonkong qalalarynda Qazaqstan óńirleriniń týrızm kúnderi, taqyryptyq aptalyq pen aýqymdy mádenı is-sharalar uıymdastyryldy. Elimiz halyqaralyq týrızm alańdary – COTTM, ITB China, ITE Hong Kong kórmelerinde laıyqty deńgeıde tanystyryldy. Bul óz kezeginde sheteldik seriktestermen jańa iskerlik baılanys ornatýǵa jáne eldiń týrıstik brendin ilgeriletýge múmkindik berdi.
Mádenı baǵdarlama da mazmundy boldy. Shandýn jáne Hebeı provınsııalarynda qazaq ónerpazdarynyń qatysýymen úlken konsertter ótti, al «Altyn adam» jáne «Uly dala» kórmelerinde Ulttyq mýzeıdiń biregeı jádigerleri qytaılyq kórermenge usynyldy.
Iri oqıǵalyq jobalar da nazardan tys qalǵan joq. Jibek joly baǵytyndaǵy avtokerýender, Peking–Paris Motor Challenge rallıi jáne moto-týrlarǵa 500-ge jýyq adam qatysyp, aımaqtyń tarıhı-mádenı baılanystyń ózektiligin aıqyndaı tústi.
Aqparattyq naýqan aýqymdy nátıjege qol jetkizdi. Resmı málimetterge sáıkes, Qazaqstan týrızminiń Qytaıdaǵy jyly 1,8 mlrd qaralym jınasa, áleýmettik jelilerde el týraly jarııalanymdardy 160 mln adam kórgen. Bul – eldiń halyqaralyq aqparattyq keńistiktegi bedelin arttyrýda aıtarlyqtaı jetistik.
Naqty nátıjeler de baıqaldy: Qytaıdan Qazaqstanǵa keletin týrıster sany 50%-ǵa ósti, al elimiz Qytaı azamattary úshin tanymal týrıstik baǵyttar reıtıngisinde 40-orynnan 29-orynǵa kóterildi. Buǵan 2023 jylǵy 10 qarashadan bastap kúshine engen vızasyz rejim aıtarlyqtaı úles qosty. Qazaqstan – Ortalyq Azııa elderi ishinde Qytaımen mundaı kelisimge qol jetkizgen alǵashqy memleket.
2025 jyl Qytaı týrızminiń Qazaqstandaǵy jyly bolyp jarııalandy. Bul bastama ekijaqty yntymaqtastyqty odan ári damytýǵa jol ashady. El azamattarynyń Qytaı mádenıeti men týrızm baǵyttaryna qyzyǵýshylyǵy artady dep kútiledi. Sonymen qatar týrıstik ınfraqurylymdy jetildirý men mádenı yqpaldastyqty tereńdetý máseleleri ózekti bola túsedi.
Osylaısha, Qazaqstan men Qytaı arasyndaǵy týrıstik yntymaqtastyq gýmanıtarlyq ári ekonomıkalyq maqsattardy ushtastyra otyryp, eki el arasyndaǵy ornyqty seriktestiktiń mańyzdy quramdas bóligine aınalyp otyr.
Baýyrjan ÁÝKEN,
QZSI Azııalyq zertteýler bóliminiń jetekshi sarapshysy