Májilistiń jalpy otyrysynda Májilis tóraǵasy Erlan Qoshanov búgin Úkimet pen Joǵary aýdıtorlyq palatanyń esebi jan-jaqty talqylanǵanyn, baıypty syn da, utymdy usynysta kóp aıtylǵanyn, ony búgingi daýys berýdiń nátıjesi de kórsetkenin, Úkimet óz jumysynda olarǵa basa nazar aýdarýǵa tıis ekenin aıtty, dep habarlaıdy Egemen.kz.
«Buryn bıýdjettiń shyǵys bóligine qatysty biraz suraq týyndaıtyn. Bıyl ókinishke qaraı bıýdjettiń kiris bóligin josparlaý men oryndaýda ketken kemshilikterge baılanysty máseleler bolyp otyr. Sonyń saldarynan Ulttyq qordan qarajat alý men syrttan qaryz alý kólemi artyp keledi. Depýtattardyń bul alańdaýshylyǵy oryndy dep sanaımyn. Tıisti memlekettik organdar osy másele boıynsha qorytyndy jasaýlary kerek», dedi Erlan Qoshanov.
Májilis tóraǵasynyń aıtýynsha, árıne, synaý da kerek. Biraq osy máselelerdiń qalaı sheshilip jatqany týraly da búgin aıtýymyz kerek. Depýtattar osy máselelerdi zańnamalyq deńgeıde sheshý úshin jyl boıy belsene jumys atqardy.
«Memleket basshysynyń tapsyrmasymen jańa Bıýdjet kodeksi ázirlendi. Onda burynnan kele jatqan túıtkilderdiń deni eskerilgen. Osylaısha, jańa Bıýdjet kodeksi burynǵy modeldiń olqy tustaryn – bólshektenýdi, jarııasyzdyqty jáne baqylaýdyń álsizdigin joıýǵa baǵyttalǵan», dep aıtqan E.Qoshanovtyń sózinshe búkil bıýdjet prosesi sıfrlanyp, ashyq bolady. Qarjylyq tártip kúsheıe túsedi. Memlekettik organdar naqty nátıjege qol jetkizý boıynsha bıýdjettik derbestikke ıe bolady.
«Jáne qarajatty ıgerý ǵana emes, dál osy jaıt olardyń tıimdiligine baǵa berýge negiz bolmaq. Eń bastysy, Ulttyq qor qarajaty tek strategııalyq maqsattar men ınvestısııaǵa jumsalady. Muny depýtattar qatań qadaǵalaıdy. Jyl saıyn Úkimet nysanaly ındıkatorlardy bıýdjet múmkindikterine oraı túzetip otyratyn. Biz oǵan jol berýge bolmaıtynyn birneshe ret ashyq aıttyq», dedi Erlan Jaqanuly.
Tóraǵanyń málimdeýinshe, memlekettik josparlaý júıesine qoıylatyn talap bıýdjetti josparlaý sapasyn jaqsartady ári memlekettik organdardyń strategııalyq basqarý baǵytyn aıqyndaı túsedi.
«Aldyńǵy jyldary biz respýblıkalyq bıýdjetke dıvıdendter tóleýde de teńgerimsizdik baryn baıqadyq. Osy másele de jańartylǵan Bıýdjet kodeksinde rettelgen. Al kvazımemlekettik sektor kompanııalarynyń dıvıdend saıasaty qaıta qaraldy. Jalpy, jańa Bıýdjet kodeksi memlekettik qarjy júıesin tolyǵymen qaıta jańǵyrtyp, Úkimettiń derbes jaýapkershiligin arttyrýǵa tıis. Bıýdjetti atqarýǵa qatysty aıtylǵan búgingi usynystarǵa Úkimet basa mán berýi qajet ekenine taǵy da nazar aýdarǵym keledi. Bul másele árdaıym depýtattardyń baqylaýynda bolady. Jalpy, birlesken jumys úshin barshańyzǵa rızashylyǵymdy bildiremin. Palatalardyń aldaǵy birlesken otyrysynda osy máseleni talqylaýdy jalǵastyramyz», dep tolyqtyrdy Májilis spıkeri.