Adam aǵzasyna asa paıdaly emdik qasıetke ıe «shyrǵanaq» ósimdigin keıbireýler bile bermeıdi. Almaty oblysynda dál osyndaı ataýmen tarıhy tereń bútin bir aýyl atalady. Qoınaýy qut aýyl irgesinen jýyrda alty qanat aqboz úıler boı túzegen «Shyraıly Shyrǵanaq» atty etnoaýyl ashyldy. Syldyraı aqqan ózen boıynda jaıqalǵan shyrǵanaq jazdygúni janǵa jaılylyq, jupar aýa, kóz súısinter kórkemdik syılaıdy.
«Maqsatymyz – aýyl mańyn halyq saıalap, demalatyn orynǵa aınaldyrý. Kóktemde bir gektar jerdi alyp jatqan etnoaýylymyzdy jıektetip 200-den asa aǵash otyrǵyzdyq. Qorshaýdyń ishki boıymen qyrǵyz taldaryn, shyrsha, samyrsyn qaraǵaıy, qaraórik, arsha aǵashtaryn ektik. Kúzde syrtyna shyrǵanaq otyrǵyzýdy josparlap otyrmyz. Sebebi aýyl irgesinen ári-beri ótken jolaýshy ózen jaǵasyndaǵy shyrǵanaqqa buryla bermeıdi. Dárýmenge óte baı jemis aǵashyn tanyp ári ony terip alýyna múmkindik týady. Aǵashtardy kútip-baptaýǵa aýyl balalaryn jumyldyryp, jas býyndy eńbekke baýlysaq, qorshaǵan ortany aıalaýdy úırenetin rýhanı ortalyqqa aınaldyrsaq degen nıettemiz», deıdi kásip ıesi Murat Nókerbanuly.
Qazdaı tizilgen qazaq úılerde aýyl qarııalary tarıhtan syr shertse, aqsamaıly analar ertegi tıegin aǵytpaq, endi birinde ulttyq qolónerimizdiń sheberlik saǵattary ótkizilse, aýlasyna qurylǵan altybaqanda aýyldyń altyaýyz áni shyrqalyp, sur mergender sadaq atyp, asyq oınap máz-meıram bolmaq. Sondaı-aq voleıbol alańy salynyp, ózen jaǵasynan basseın iske qosylady. Ári olar tegin qyzmet kórsetedi. «Tazabek batyr sarbazdary qylyshyn qaıraǵan tas» ta jádiger retinde osy etnoaýyldan oryn alǵan. Keleshekte ulttyq muraǵa aınalǵan qundy dúnıelerdi jınap, aspanasQty mýzeıin ashý josparda bar. Sonymen birge jármeńke uıymdastyryp, sheberlerdiń qolynan shyqqan buıymdy saýdalaýyna tegin oryn berý kózdelgen.
Bir sózben, jańadan boı kótergen ásem etnoaýyl 2 myńǵa jýyq halqy bar Shyrǵanaqtyń shyraıyn kirgizip, turǵyndardyń turmysyna da oń áserin tıgizetin bolady.
Almaty oblysy