Astanadaǵy Millennium Park turǵyn úı kesheninde 22 maýsym kúni keshke aýyr qylmys jasaldy. 21 jastaǵy er adam burynǵy qyzyna shabýyl jasap, ony pyshaqtap óltirdi. Oqıǵa barysynda marqumnyń kámeletke tolmaǵan inisi de jaraqat alyp, aýrýhanaǵa jetkizildi, dep habarlaıdy Egemen.kz «kriminal kazakhstan» arnasyna silteme jasap.
Kórshilerdiń aıtýynsha, qyz páterden pyshaq jaraqattarymen tabylǵan. Oqıǵa aldynda páterden qatty shý estilgen. Osydan keıin kúdikti kóshede júrgen adamdarǵa pyshaqpen shabýyl jasap, marqumnyń kishkentaı inisin jaralaǵan. Jasóspirim keıin balalar alańynda pyshaq jaraqattarymen tabylyp, aýrýhanaǵa jetkizildi.
Habarlamada aıtylǵandaı, shabýyldan keıin qaskóı marqumnyń páterinde tyǵylyp qalǵan. Polısııa kelgen kezde 21 jastaǵy er adam óz erkimen berilgen.
Astana qalalyq polısııa departamenti bul fakt boıynsha kisi óltirý babymen qylmystyq is qozǵalǵanyn, kúdiktiniń ustalyp, ýaqytsha ustaý ızolıatoryna qamalǵanyn málimdedi.
«Polısııaǵa turǵyn úıdegi páterlerdiń birinen pyshaq jaraqaty boıynsha habarlama kelip tústi. Oqıǵa ornynan zorlyq-zombylyq belgileri bar qyzdyń máıiti tabyldy. Sonymen qatar onyń kámeletke tolmaǵan inisi de zardap shekti, ol pyshaq jaraqatymen aýrýhanaǵa jetkizildi. Qazirgi ýaqytta oqıǵanyń barlyq mán-jaıy anyqtalyp jatyr», delingen vedomstvo habarlamasynda.
QR Qylmystyq-prosestik kodeksiniń 201-babyna sáıkes, ózge aqparat jarııa etilmeıdi.