Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde sóz sóıledi, dep habarlaıdy Egemen.kz Aqordanyń baspasóz qyzmetine silteme jasap.
Búgin elimizde Polısııa kúni men Memlekettik qyzmetshiler kúni qatar atalyp ótip jatyr. Osyǵan oraı Memleket basshysy Qasym-Jomart Toqaev elimizdiń quqyq qorǵaý salasy men memlekettik apparat qyzmetkerlerine arnap quttyqtaý sóz sóılep, olardyń qoǵamdaǵy mańyzdy róline toqtaldy.
«Búgin elimizde – Polısııa kúni jáne Memlekettik qyzmetshi kúni atalyp ótýde. Sondyqtan, aldymen, elimizdegi polısııa qyzmetkerleri men memlekettik qyzmetshilerdi kásibı meıramdarymen quttyqtaımyn. Memleketke qyzmet etý – eń qurmetti ári asa jaýapty mindet. Sizder zań men tártipti saqtaýǵa jáne azamattardyń quqyǵyn qorǵaýǵa zor úles qosyp júrsizder. Qazir dúnıe júzi almaǵaıyp, bulyńǵyr, ıaǵnı, óte kúrdeli kezeńdi bastan ótkerýde. Osyndaı qubylmaly ýaqytta qoǵamdyq qaýipsizdikti saqtaý, zańnyń múltiksiz oryndalýyn qamtamasyz etý – aıryqsha mańyzdy mindet», dedi Memleket basshysy.
Prezıdent atap ótkendeı, quqyq qorǵaý júıesin jańǵyrtýda jańa býynnyń orny erekshe. Osyǵan baılanysty jıynǵa arnaıy túrde vedomstvolyq oqý oryndarynyń kýrsanttary shaqyrylǵan.
Sonymen qatar Memleket basshysy transulttyq qylmystyq toptarmen kúres jolynda halyqaralyq áriptestiktiń mańyzdylyǵyna nazar aýdardy.
«Sol sebepti, búgin biz alǵash ret osyndaı qurammen jınalyp otyrmyz. Quqyq qorǵaý júıesindegi barlyq jaýapty qurylymdar jumyla jumys isteýi qajet. Elimizde «Zań men tártiptiń» qatań saqtalýyna qoǵam ókilderiniń qosar úlesi de orasan zor. Qazir osy jıynǵa ortalyq jáne jergilikti atqarýshy organ basshylary, depýtattar, sarapshylar jáne belsendi azamattar qatysyp otyr. Kúshtik qurylymdardy jańǵyrtý isinde jańa býynnyń atqaratyn róli erekshe. Sol sebepti, búgingi basqosýǵa akademııalardyń kýrsanttary da arnaıy shaqyryldy. Transulttyq qylmystyq toptarmen kúresý úshin halyqaralyq yntymaqtastyqty damytý óte mańyzdy. Osy jerde búgin sheteldik polısııa attasheleri otyr. Quqyq qorǵaý organdarymen júrgizip jatqan halyqaralyq yntymaqtastyq jumysy úshin Sizderge erekshe rızashylyǵymdy bildiremin», dedi Qasym-Jomart Toqaev.