Quqyq qorǵaý organdarynyń qyzmetkerleri Ile Alataýyndaǵy 28 gvardııashy-panfılovshylar shyńyna shyqty. Igi bastama «Zań jáne tártip» jobasy aıasynda júzege asyryldy. Sporttyq is-sharaǵa Ishki ister mınıstrligi, Bas prokýratýra, Qarjylyq monıtorıng agenttigi men Sybaılas jemqorlyqqa qarsy qyzmet ókilderi qatysty.
Top Tuıyqsý men Myńjylqy shatqaly, «Alpıngrad» jáne Mánshúk Mámetova atyndaǵy asý arqyly júrip ótken. Sóıtip, Ile Alataýy silemderiniń túıisken jerinde ornalasqan 28 gvardııashy-panfılovshylar shyńyna shyqty. Keıin osy jerge elimizdiń Memlekettik týy men «Zań jáne tártip» jalaýyn tikti. Qatysýshylardyń aıtýyn- sha, 4 120 metr bıiktikke kóterilý ońaı bolmapty.
«Bastapqyda kún ashyq bolǵan, keıin qubyldy. Jańbyr men burshaq jaýyp, qalyń tuman basyp joldy kórý qıyndady. Osylaı taýdyń eń bıik shyńyn baǵyndyrý ońaı bolǵan joq. Shamamen 12 saǵatta sapardy aıaqtadyq», deıdi sporttyq is-sharaǵa qatysýshylardyń biri Almaty qalasy Áýezov aýdany prokýratýrasynyń bólim bastyǵy Eraly Sovet.
Jalpy, quqyq qorǵaý organdary qyzmetkerleriniń osyndaı qarly asýǵa umtylysy – ádildik pen zań ústemdigine degen adal nıettiń, bıik murattyń rámizi ispetti. Bul – tek fızıkalyq turǵyda baǵyndyrǵan shyń emes, moraldyq ári kásibı bıiktikti baǵyndyrýǵa degen umtylys. Bir jaǵynan mundaı is-sharalar sala mamandary arasyndaǵy ózara yntymaqtastyq pen áriptestikti nyǵaıtyp, birlikti bekemdeı túsedi.