Ishki naryqty otandyq taýarly balyqpen tolyqtyrý mańyzdy mindet. Taıaýda Memleket basshysy Qasym-Jomart Toqaev «Akvamádenıet týraly» zańǵa qol qoıdy, dep jazady Egemen.kz.
Zerendi kóliniń jaǵasyndaǵy balyq tálimbaǵy alpys jyldan astam ýaqyt boıy jumys istep keledi. Tálimbaqtyń sehtarynda aqbalyq pen tuqy ósirilýde. Dernásilder ósip jetilgen soń kólge jiberiledi. Kásiporyn aýmaǵynda 240 gektar toǵan sharýashylyǵy jumys isteıdi.
–Jyl saıyn biz osy toǵandarda melıorasııalyq jumys júrgizemiz, – deıdi Zerendi balyq sharýashylyǵy kásipornynyń dırektory Valerıı Ponamorenko, – baldyrdan tazalaımyz, tuqy qurtymen qorektendirip, balyqtardy ósiremiz. Ádette biz tuqy tuqymyn tamyz, qyrkúıek aılarynda alamyz.
Kásiporynda 24 adam jumys isteıdi. Olardyń barlyǵy óz isteriniń shynaıy mamandary. Aımaqta balyq ósirýge qolaıly 632 sý qoımasy bar. Onyń 360-y balyqpen aınalysatyn sharýashylyqtarǵa bekitilgen, qalǵany rezervtik qorda.
–Taýarly balyq ósirý sharýashylyǵyn damytý úshin 169 sporttyq áýesqoılyq baǵyttaǵy 8 jáne kásiptik balyq aýlaý úshin 103 sý aıdyny belgilengen, – deıdi Esil oblysaralyq basseındik balyq sharýashylyǵy ınspeksııasynyń bólim basshysy Sansyzbaı Ydyrysov, – byltyr jospar boıynsha 1520 tonna taýarly balyq ósirý mejelense, tabıǵatty paıdalanýshylar bul kórsetkishti asyra oryndady. Bıyl eki myń tonna balyq aýlaýdy kózdep otyrmyz.
О́ńirde bes aı ishinde 335 tonna balyq ósirilgen. Qońyr kúzde aqbalyq pen tuqy aýlaý mólsheri arta túsedi. Elimizde balyq sharýashylyǵyn damytý baǵdarlamasyna sáıkes 2030 jyly 270 myń tonna taýarly balyq óndirý josparlanyp otyr. Aldaǵy ýaqytta oblys óz úlesin on myń tonnaǵa jetkizbek.
Aqmola oblysy