Tarıhy tereń, tabıǵaty kórkem áıgili Qarqara jaılaýynda 100 shaqty qazaq úı tigilip, 100-ge taıaý kúbi pisilip, ulttyq salt-dástúrimiz áspettelip, án-kúıimiz qalyqtaǵan «Qymyzmuryndyq–2025» halyqaralyq festıvali joǵary deńgeıde ótti.
Bıyl da jibin úzbeı jalǵasqan qymyzmuryndyq – kerege taýly Kegen aýdanynyń brendine aınalǵany aqıqat. Tańdaıǵa tatymdy qymyzdyń alýan túrinen shól qandyryp, óńirdiń saf aýasyn jutýǵa arysy Atyraý men Altaıdan bastap, elimizdiń ár óńirinen 10 myńǵa tarta halyq jıylsa, 10 memleketten arnaıy delegasııa ókilderi keldi. Ultymyzdyń uly qundylyqtary saltanat qurǵan mádenı-tanymdyq máni zor sharaǵa Almaty oblysynyń ákimi Marat Sultanǵazıev aıryqsha qoldaý bildirip keledi.
«Qymyzmuryndyq – halqymyzdyń turmys-salty men rýhanı mádenıetinen syr shertetin uly mura. Memleket basshysy Qasym-Jomart Toqaev Ulttyq quryltaıda: «Halqymyzdyń ata-babadan mıras bolǵan mol murasy bar, ony zaman talabyna saı jańǵyrtyp, barynsha nasıhattaýymyz kerek», degen bolatyn. Búgingi is-sharaǵa shet memleketterdiń ókilderi, elimizdiń aıtýly memleket jáne qoǵam qaıratkerleri, halqymyzǵa belgili ádebıet jáne mádenıet maıtalmandary, respýblıkalyq qoǵamdyq uıymdar men etnomádenı birlestik músheleri qatysyp otyr. Osynyń ózi qazaq halqy men onyń ulttyq mádenıetine degen qurmetti kórsetedi.
Qymyzmuryndyq – elimizdi tanytatyn, rýhanı qundylyǵymyzdy jańǵyrtatyn mazmundy bastama. Qymyz daıyndaý – tek sheberlik emes, ómir pálsapasy. Bıe baılap, qymyz ashytyp, ony qonaqqa usyný – halqymyzdyń ǵasyrlar boıy jalǵasyp kele jatqan erekshe dástúri. Biz búgin – baba amanatyn oryndaý maqsatynda zamanaýı tehnologııalardy paıdalanyp, qymyz óndirisiniń kólemin arttyryp, ony saqtaý, tasymaldaý jáne saýda jelilerine jetkizý jolynda eńbek etýdemiz. Sonyń nátıjesinde halyqtyń ulttyq ónimge degen suranysy jyldan-jylǵa artyp keledi. Qymyz óndirisi jylqy sharýashylyǵymen tikeleı baılanysty. Búginde oblysymyzda jylqy sany 268 myńǵa jetip, ótken jylmen salystyrǵanda 6 paıyzǵa ósip otyr», degen oblys ákiminiń birinshi orynbasary Nurlan Ábdirahym jıylǵan qaýymdy ulttyq merekemen quttyqtady.
Saltanatty is-sharada Parlament Májilisiniń depýtaty Janarbek Áshimjan qymyzmuryndyq – han jaılaý atanǵan Qarqaraǵa ǵana emes, elimizge, alys-jaqyn shetelge málim uly jármeńkege aınalyp kele jatqanyn atady.
Al Jazýshylar odaǵynyń basqarma tóraǵasy Mereke Qulkenov: «Qymyzmuryndyq – kópten umyt bolǵan ulttyq is-shara. Osy arqyly – ulttyq qundylyqtarymyzdy, artyqshylyqtarymyzdy, danalyǵymyzdy, jyrymyzdy, basqa da mádenı muralarymyzdy jańǵyrta berýimiz kerek. Bul tek Almaty oblysynda ǵana emes, elimizdiń túkpir-túkpirinde toılanýǵa tıis. Sonda halqymyzdyń rýhanı mádenıetine tyń serpin beredi», dedi.
Aspanasty sahnada uly kósh sap túzese, Qazaqstannyń halyq ártisteri Altynbek Qorazbaev, Ramazan Stamǵazıev bastaǵan estrada juldyzdary áýelete án shyrqap, halyqtyń qulaq quryshyn qandyrdy.
Atqa minse arqalanyp ketetin babalarymyzdyń búgingi urpaǵy da qalyspaı qyz qýý, teńge ilý syndy ulttyq oıyndardy pash etti. Tolaǵaılar ziltas, qoshqar kóterip, arba súırep, arqan tartysyp, beldesip, bilek kúshin synasyp, ulttyq sporttyń alýan túrinen baq synasty. Jeńimpazdar baǵaly syılyqtar aldy.
Atadan mıras bolǵan qolóner kórmelerinde aýyldyq okrýgterden kelgen aqsamaıly atalar men analar ulttyq taǵamdar ázirleýmen qatar, syrmaq syrý, jún tútý, urshyq ıirý, qamshy órý, at ábzelderin jasaý syndy sheberlikterin kórsetti. Bul kúni aýylsharýashylyq kórmesi de óz dárejesinde uıymdastyryldy.
Dala tósin dúbirletken qymyzmuryndyqty qoǵam qaıratkeri Jolan Omarovtyń qurmetine ótken «Jolan júırigi» atty at báıgesi túıindedi. Jal-quıryǵy súzilgen sáıgúlikter jarysyna júzden asa at qatysyp, alaman men top báıgede top jarǵan tulpar ıeleri avtokólik kiltterin ıemdense, qunan báıge jeńimpazy 2 mln teńgeni qanjyǵasyna baılady.
Almaty oblysy