Aýyl sharýashylyǵy salasyndaǵy Qazaqstan-Qyrǵyzstan jumys tobynyń II otyrysy ótti. Jıynǵa Aýyl sharýashylyǵy vıse-mınıstri Baǵlan Bekbaýov pen Qyrǵyz Respýblıkasynyń Sý resýrstary, aýyl sharýashylyǵy jáne óńdeý ónerkásibi mınıstriniń orynbasary Samat Nasırdınov teń tóraǵalyq jasady.
Taraptar Úkimetaralyq keńestiń 12-otyrysynda qol jetkizilgen kelisimderdiń oryndalýyn, 2024–2025 jyldarǵa arnalǵan aýyl sharýashylyǵy ónimderiniń ózara jetkizilimin ulǵaıtý jónindegi Jol kartasynyń iske asyrylýyn, sondaı-aq agrarlyq saladaǵy ekijaqty yntymaqtastyqtyń ózekti máselelerin talqylady.
Baǵlan Bekbaýov agroónerkásiptik ónimder boıynsha ózara taýar aınalymynyń turaqty oń serpinin atap ótti. 2024 jyly taýar aınalymy 350,9 mln dollarǵa jetip, ótken jylmen salystyrǵanda 8,4%-ǵa artty. 2025 jyldyń I toqsanynda ósim 43,5%-dy qurap, 99,9 mln dollar boldy. Onyń ishinde Qazaqstannan eksport – 80,1 mln dollar (+44,3%), ımport – 19,8 mln dollar (+39%).
Kezdesýde aýyl sharýashylyǵyna ınnovasııalyq tehnologııalardy engizý boıynsha tehnıkalyq kómek kórsetý jónindegi is-sharalar josparynyń jobasyna erekshe nazar aýdaryldy. Qujat seleksııa, asyldandyrý jumystary jáne aqparattyq derekqorlardy damytý boıynsha tájirıbe almasýdy kózdeıdi. Qazaqstan tarapy astyq qolhattary úlgisinde qoıma kýálikteriniń aınalymy boıynsha tájirıbesimen bólisip, bul baǵytta «Aqparattyq-esep ortalyǵy» AQ bazasynda praktıkalyq konsýltasııalyq kezdesý ótkizýge daıyn ekenin bildirdi.
Otyrys aıasynda taraptar yqtımal jobalar tizimin ózara almasyp, birlesip júzege asyrý úshin naqty 2-3 jobany aıqyndaýǵa kelisti. Sonymen qatar Astana qalasynda qanatqaqty formatta aýyl sharýashylyǵy jármeńkesin ótkizý, keıin ony elimizdiń basqa óńirlerinde jalǵastyrý týraly usynys qoldaý tapty.
Shekara beketterinde júk avtokólikteriniń ótkizý qabiletin arttyrý máseleleri de qaraldy.
Ekijaqty saýdany damytý maqsatynda taraptar «Kyrgyz-Agroholdıng» AAQ pen «QazTrade» saýda saıasatyn damytý ortalyǵy» AQ arasynda ónim jetkiziliminiń boljamdy kólemin kórsete otyryp, memorandýmǵa qol qoıýǵa ýaǵdalasty. Jambyl (Qazaqstan) jáne Talas (Qyrǵyzstan) oblystary arasynda aýyl sharýashylyǵy ónimderiniń shekara mańyndaǵy saýdasyn jandandyrý josparlanyp otyr.
Qazaqstan bıdaıyn jetkizýdi arttyrý maqsatynda taraptar temirjol tarıfteri máselesin pysyqtap, múddeli uıymdardyń qatysýymen kelissózder júrgizedi. Otyrys qorytyndysy boıynsha qoljetkizilgen kelisimder men aldaǵy yntymaqtastyq baǵyttaryn bekitetin hattamaǵa qol qoıyldy.