Parlament Senatynyń tóraǵasy Máýlen Áshimbaev Sıngapýr Respýblıkasyna sapary aıasynda el Prezıdenti Tarman Shanmýgaratnammen jáne Parlament spıkeri Sea Kıan Penmen kezdesti. Kezdesý barysynda taraptar yntymaqtastyqty odan ári nyǵaıtý máselelerin talqylap, osy baǵyttaǵy birlesken jumystyń mańyzdy mindetterin aıqyndady.
Máýlen Áshimbaev Sıngapýr Respýblıkasynyń Prezıdenti Tarman Shanmýgaratnamǵa Qazaqstan Prezıdenti Qasym-Jomart Toqaevtyń jyly lebizin jetkizip, sıngapýrlyqtardy kele jatqan Táýelsizdik kúnimen quttyqtady. Sondaı-aq ol Qazaqstan Sıngapýrdy qashanda júıeli damýdyń ozyq úlgisi sanaıtynyn tilge tıek etti.
Senat tóraǵasy atap ótkendeı, Qazaqstan men Sıngapýr ondaǵan jyldar boıy ózara qurmetke jáne ortaq qundylyqtar men múddege negizdelgen berik seriktestik qalyptastyrdy. Keıingi jyldarda ekijaqty yntymaqtastyq aıtarlyqtaı nyǵaıa túskenine de mán berildi.
«Qazaqstan Prezıdenti Qasym-Jomart Toqaev byltyr Sıngapýrǵa jasaǵan memlekettik sapary aıasynda oqyǵan dárisinde sizderdiń elderińiz Qazaqstandy damý men órkendeý baǵytynda ózindik jol tańdaýǵa jigerlendiretinin aıtty. Qazirgi tańda eki el arasynda ózara qurmetke, ortaq qundylyqtarǵa jáne uqsas ustanymǵa negizdelgen berik, uzaqmerzimdi áriptestik ornady. Keıingi jyldary bizdiń yntymaqtastyǵymyz odan ári nyǵaıa tústi», dep Senat tóraǵasy Sıngapýr Prezıdentine Qazaqstan Prezıdenti Qasym-Jomart Toqaevtyń bastamasymen júrgizilip jatqan reformalar jóninde aıtyp berdi.
О́z kezeginde Tarman Shanmýgaratnam Qazaqstan basshylyǵyna senim tanytqany jáne Sıngapýrdaǵy ózgeristerge qoldaý kórsetkeni úshin rızashylyq bildirdi. Sondaı-aq rýhanı dıplomatııany ilgeriletýge jáne kóp formatty Qazaqstan-Sıngapýr qatynastaryn damytýǵa qosqan úlesi úshin alǵys aıtty. Odan bólek, eki memleket arasyndaǵy saıası dıalog jáne ózara tıimdi seriktestik deńgeıine joǵary baǵa berdi.
Parlament spıkeri Sea Kıan Penmen kezdesýde ózara parlamentaralyq qarym-qatynastardy damytý keleshegi áńgimege arqaý boldy. Máýlen Áshimbaev ekijaqty baılanystyń joǵary deńgeıine jáne kúshti memlekettik basqarýdy kópultty ókildik pen saıası sabaqtastyqty qamtamasyz etetin tetiktermen úılestiretin eldiń biregeı parlamenttik modeline nazar aýdardy. Osy oraıda taraptar aldaǵy kezeńde eki eldiń Parlamentteri arasynda zań shyǵarý salasyndaǵy ózara is-qımyldy tereńdetýge múddeli ekenderin bildirdi.
«Qazaqstan Parlamenti Sıngapýrdyń ártúrli saladaǵy, sonyń ishinde zańnamalyq baǵyttaǵy biregeı tájirıbesine erekshe qyzyǵýshylyq tanytady. Atap aıtqanda, zań shyǵarý úderisin sıfrlandyrý, jasandy ıntellekt, jasyl ekonomıka jáne tıimdi memlekettik basqarýdy qoldana otyryp, jobalar ázirleý máseleleri – basty nazarymyzda. Bizdiń Parlamenttiń eki palatasynda da jumys isteıtin Sıngapýrmen dostyq toptarynyń áleýetin belsendi paıdalanýdyń mańyzy zor. Bul depýtattarymyz arasyndaǵy yntymaqtastyqtyń eleýli tetigi ekeni anyq», dedi M.Áshimbaev.
Sondaı-aq Senat tóraǵasy Memleket basshysy Qasym-Jomart Toqaevtyń bastamasymen Qazaqstanda júzege asyrylyp jatqan aýqymdy saıası jańǵyrtýlarǵa toqtalyp, damýdyń jańa ekonomıkalyq modelin qalyptastyrý baǵytyndaǵy jumystar jóninde aıtty.
«Qazirgi tańda Qazaqstanda ulttyq ekonomıkany ártaraptandyrýdy kózdeıtin mańyzdy reformalar júrgizilip jatyr. Osy rette biz energetıka, paıdaly qazbalardy óńdeý, ınfraqurylymdy damytý, sıfrlyq ekonomıka, qarjy tehnologııalary, logıstıka jáne baılanys sııaqty negizgi sektorlarda yntymaqtastyqty nyǵaıtýdyń bolashaǵy zor dep esepteımiz. Ortalyq Azııaǵa salynyp jatqan barlyq tikeleı sheteldik ınvestısııanyń 60 paıyzdan astamy – Qazaqstannyń enshisinde. Biz sheteldik kompanııalar úshin barynsha qolaıly jaǵdaı jasaýǵa tolyq daıynbyz. Sonyń aıasynda sheteldik ınvestorlardy qoldaý úshin qajetti zańnamalyq sharalar da qabyldadyq», dep M.Áshimbaev sıngapýrlyq kompanııalardy yntymaqtasa jumys isteýge jáne birlesken kásiporyndar qurýǵa shaqyrdy.
О́z kezeginde Sıngapýr Parlamentiniń spıkeri Qazaqstanda júrgizilip jatqan qoǵamdyq-saıası ózgeristerge joǵary baǵa berdi jáne barlyq baǵyt boıynsha yntymaqtastyqty odan ári keńeıtýge múddeli ekenin jetkizdi.
Sonymen qatar Qazaqstan Parlamentiniń depýtattary Sıngapýrdyń «Punggol Digital District» sıfrlyq klasterine bardy. Bul – 50 gektar aýmaqty alyp jatqan, kıberqaýipsizdik, jasandy ıntellekt, robottehnıka, qarjy tehnologııalary sııaqty negizgi sektorlarda sıfrlyq salanyń kóshbasshy kompanııalary ornalasqan ornyqty bıznes-ınnovasııalyq aýdan. Platforma ártúrli júıe men sensorlardan derekter jınaıdy. Onyń ishinde lıftter, jaryqtandyrý, ınjenerlik jeliler; ǵımarattardyń qamtylý kórsetkishteri, temperatýra, ylǵaldylyq, jaýyn-shashyn jáne taǵy basqa klımattyq parametrler bar.
Budan basqa, depýtattar «Marina Barrage» gıdrotehnıkalyq nysanynyń qyzmetimen tanysty. Ol Sıngapýrdyń birinshi Premer-Mınıstri Lı Kýan Iýdyń ıdeıasymen salynǵan. Bóget sý qoryn ulǵaıtyp qana qoımaı, tolqyn men jańbyr kezinde jaǵalaýlardyń sý astynda qalýyna jol bermeıtin tosqaýyl retinde jumys isteıdi.