Talǵar aýdanyna qarasty Jańalyq aýylynda 900 oqýshyǵa arnalǵan jańa mektep paıdalanýǵa berildi. Úsh qabatty, zamanaýı bilim oshaǵy Memleket basshysy Qasym-Jomart Toqaevtyń tapsyrmasyna sáıkes júzege asyp jatqan «Keleshek mektepteri» ulttyq jobasy men «Amanat» partııasynyń 2023–2027 jyldarǵa arnalǵan saılaýaldy baǵdarlamasynyń Jol kartasy aıasynda salyndy. Jańa mektep úsh aýysym máselesin sheshýmen qatar, 100-ge jýyq muǵalimge turaqty jumys ornyn usynady.
Mekteptiń ishki ınfraqurylymy qazirgi zaman talaptaryna saı jabdyqtalǵan. Bilim ordasynda pándik kabınettermen qatar STEM jáne robottehnıka synyptary, ınklıýzıvti bilim berý ortalyǵy, kitaphana, sheberhana, sport jáne akt zaly, keń ashana men májilis zaly qarastyrylǵan.
Eńseli bilim ordasynyń ashylý saltanatynda Almaty oblysynyń ákiminiń orynbasary Bolat Kúreńbekov turǵyndardy qýanyshtarymen quttyqtap, bul nysannyń óńirdegi ózekti áleýmettik máseleniń sheshimine aınalǵanyn aıtty.
«Bul bilim ordasy – Prezıdent bastamasymen júzege asyp jatqan «Keleshek mektepteri» jobasy aıasynda boı kótergen alǵashqy zamanaýı mektepterdiń biri. Memleket basshysynyń «Biz Qazaqstandaǵy barlyq balanyń baqytty bolashaǵyn qamtamasyz etýimiz kerek» degen sózi búgingi istiń mán-mańyzyn asha túsedi», dedi ol.
Búginde halyq sany 15 myńnan asatyn Jańalyq aýylynda 5 shaǵyn aýdan bar. Osy aýyldar boıynsha 2 myńǵa jýyq bala №37 orta mektepte úsh aýysymmen bilim alyp kelgen. Olardyń jartysyna jýyǵy jańa qurylystan tasymaldanyp oqytylatyn. Endi zamanaýı jańa mekteptiń qurylysy aıaqtalyp, paıdalanýǵa berilgenine balalarmen qatar, ata-analar da shat-shadyman bolyp otyr.
«Aýylymyzda kópbalaly otbasylar óte kóp. Osyǵan deıin úsh aýysymda tasymalmen oqyp keldi. Balalarymyz sabaqqa baryp kelgenshe alańdap otyramyz. Jańa mekteptiń ashylýyn asyǵa kúttik. Barlyq standartqa saı salynǵanyna, eń bastysy balalarymyzdyń bilim alýyna qyzyǵýshylyǵyn arttyratyn materıaldyq bazamen jabdyqtalǵanyna qatty qýanyp otyrmyz. Meniń 5 balam bar, 4-ýi mektepte, úzdik oqıdy», deıdi kópbalaly ana Sholpan Úmbetbaeva.
О́tken jyly óńirde 9 jańa mektep qoldanysqa berilse, bıyl taǵy 17 nysannyń qurylysy júrgizilip jatyr. Bul baǵytta memleket-jekemenshik áriptestik tetikteri qoldanylyp, jeke ınvestısııalar da tartylyp otyr.
Nátıjelerge qol jetkizýde jergilikti atqarýshy organdarmen qatar, partııalyq baqylaý men saıası qoldaýdyń da mańyzy zor. «Amanat» partııasy óńirlerdegi ınfraqurylymdyq bastamalardyń júzege asýyna tikeleı aralasyp keledi.
«Eki jyl buryn mektep tapshylyǵy máselesin sheshemiz dep ýáde berdik. Sol kezde oblysta úsh aýysymdy 52 mektep bolǵan. Qazir bul san 30-ǵa deıin qysqardy. Jańalyqtaǵy mektep – jol kartasynda kózdelgen 63 mekteptiń qataryndaǵy naqty júzege asqan joba. Qurylys bastalǵan kúnnen bastap partııalyq baqylaýda boldy. Ýáde bergen soń, sol úderistiń ishinde bolý – bizdiń mindet», dedi «Amanat» partııasy Almaty oblystyq fılıalynyń tóraǵasy Qýat Baıǵojaev.
Almaty oblysy