«Taza Qazaqstan» jobasy, «Taza beısenbi» ekoaksııasy aıasynda «Amanat» partııasynyń músheleri Qarasaı aýdanyndaǵy Shamalǵan ózeniniń mańyndaǵy aýmaqty turmystyq qaldyqtardan tazartty. Ekologııalyq is-sharaǵa barlyq deńgeıdegi máslıhat depýtattary, bastaýysh partııa uıymdarynyń músheleri, aýyl turǵyndary qatysty.
Aksııaǵa qatysqan 30-ǵa jýyq adam belsendilik tanytyp, týǵan ólkeniń tazalyǵyn saqtaýǵa óz úlesin qosty. Aýmaǵy 2 gektar jerden jınalǵan 1,5 tonna qoqys arnaıy polıgonǵa jiberildi.
«Jazǵy ýaqytta azamattardyń kóp demalatyn jeri – ózen-kóldiń jaǵasy, sol turǵyda Shamalǵan jaǵasyn taza ustaý – negizgi maqsatymyz. Tazalaý barysynda burynnan qordalanǵan turmystyq qaldyqtar, polıetılen paket, plastık bótelkeler sııaqty kúl-qoqystar shyǵarylyp, polıgonǵa jóneltildi. «Taza beısenbi» ekoaksııasy eldi mekenderde de júıeli jolǵa qoıylǵan. Aldaǵy ýaqytta da bul ekologııalyq aksııa jalǵasyn tabatyn bolady. Árbir azamat týǵan jerine degen qurmetin, paryzyn qorshaǵan ortany saqtaý, qorǵaý, kútip ustaý arqyly kórsete bilý kerek», dedi «Amanat» partııasy Qarasaı aýdandyq fılıalynyń tóraǵasy Qanybek Aıtjanov.
Aýdandyq máslıhat depýtaty Bekjan Súnbekovtiń aıtýynsha, ekologııalyq máselelerdi sheshý – «Amanat» partııasynyń saılaýaldy baǵdarlamasynda qamtylǵan mańyzdy basymdyqtyń biri.
«Partııa músheleri tabıǵatty aıalaý isin ári qaraı jalǵastyrýǵa nıetti. О́ńirlik saılaýaldy baǵdarlamasy aıasynda 2027 jylǵa deıin barlyq aýdan ortalyǵynda, Qonaev qalasynda ruqsat etilmegen qoqys úıindilerin joıý mindeti tur. Onymen qosa, óńirde tórt polıgon, keshendi qoqys tıeý men suryptaý alańy salynbaq. Sondaı-aq barlyq aýylda qoqysty bólek suryptaýǵa, quramynda synap bar qaldyqtardy jınaýǵa arnalǵan keminde 1 myń konteıner ornatylady», deıdi depýtat.
Almaty oblysy