9 shilde kúni qaıyrymdylyq qoryna túsken 3,5 mlrd teńgeni jymqyrdy degen kúdikpen ustalǵan Perızat Qaırat pen anasy Ǵaını Alashbaevaǵa qatysty qylmystyq is boıynsha aldyn ala tyńdaý ótken edi. Sot zalynda P.Qaırat tergeý ızolıatory qyzmetkerleri tarapynan soqqyǵa jyǵylǵanyn aıtqan bolatyn. Búgin Astana qalalyq polısııasy kúdiktiniń málimdemesine jaýap berip, oqıǵa boldy delingen kúnniń beınejazbasyn jarııalady, dep jazady Egemen.kz.
Elorda polısııasynyń habarlaýynsha, 9 maýsym kúni tergeýdegi P.Qaırat prokýratýra organdaryna aryz túsirip, mekeme qyzmetkeri kamera esigin kúshtep japqan kezde ony esik arasyna qysyp, dene jaraqatyn keltirgenin málimdegen.
Atalǵan aryz boıynsha jınaqtalǵan materıaldar Astana qalasy Polısııa departamentine joldanǵan. Qazir sotqa deıingi tergep-tekserý amaldary júrgizilip jatyr. Tergeý barysynda mekemeniń beınebaqylaý kameralaryndaǵy jazbalar zerdelenip, qyzmetkerler men kýálardan jaýap alynǵan.
Polısııa alǵashqy tergeý áreketteriniń nátıjesin jarııalady.
«Alǵashqy tergeý áreketteriniń nátıjesi boıynsha P.Qaırat málimdegendeı, kamera esigin jabý kezinde mekeme qyzmetkerleriniń oǵan dene jaraqatyn keltirýi týraly sózderi rastalmaıdy. Buǵan P.Qaırat óz aryzynda kórsetken oqıǵa sátindegi beınebaqylaý jazbasy dálel bolyp otyr», delingen habarlamada.
Aıta keteıik, tergeý áli jalǵasyp jatyr. Tıisti saraptama da taǵaıyndalǵan.