Bıylǵy 1 shildedegi jaǵdaı boıynsha memlekettik eńbek ınspektorlary elimizdegi 92 kásiporyn 2,1 myńnan astam jumyskerge 882 mln teńgege jalaqy boıynsha bereshek ekenin anyqtaǵan. Túrli uıymdarda júrgizilgen tekserýler barysynda eńbek quqyǵy buzylýynyń 3,6 myńǵa jýyq faktisi belgili bolǵan. Atalǵan máseleler boıynsha anyqtalǵan kásiporyndardyń basshylaryna oryndaýǵa mindetti 1 951 uıǵarym berilip, 233 mln teńgeden astam somaǵa aıyppul salynǵan, dep jazady Egemen.kz.
Jalaqy boıynsha bereshekti óteýdiń qatań kesteleri men merzimderin belgileýdiń nátıjesinde 2 myńnan astam jumyskerdiń quqyqtary qorǵalyp, olarǵa 755,4 mln teńge tólendi.
Eńbek jáne halyqty áleýmettik qorǵaý mınıstrliginiń habarlaýynsha osy jylǵy 1 shildedegi derekter boıynsha memlekettik eńbek ınspektorlary júrgizgen 2 941 tekserý barysynda 3 608 buzýshylyq anyqtalǵan, onyń ishinde: eńbek salasynda – 2 973, eńbek qaýipsizdigi jáne eńbekti qorǵaý boıynsha – 616, halyqty jumyspen qamtý boıynsha – 19.
Qabyldanǵan sharalardyń nátıjesinde 21 myń jumyskerdiń eńbek quqyǵy qorǵalǵan.