Sońǵy jyldardaǵy geosaıası jaǵdaıda eldegi tranzıttik baǵyttardy ártaraptandyrý isi birinshi orynǵa shyqty. Sondyqtan Orta dálizdiń múmkindikterin arttyrý sharasy kúsheıdi. Sondaı-aq, taıaýda Kaspıı teńiziniń túbimen Ázerbaıjan men bizdiń el arasynda joǵary jyldamdyqty ınternet-kabel tartý jumysy bastalyp ketti. Sonymen qatar, Transkaspıı munaı-gaz qubyryn salý múmkindigi de zerttelip, tııanaqtalyp jatyr, dep jazady Egemen.kz.
Byltyrǵy jyl qorytyndysynda Orta dáliz arqyly tasymal kólemi burnaǵy jylmen salystyrǵanda 65%-ǵa artqan edi. Eýrazııa keńistiginiń ortasyna ornalasqan elimizde 11 halyqaralyq tranzıttik dáliz bar ekeni málim. Olardyń ótkizý qabiletin arttyrý men júk tasymalyndaǵy jaǵdaıdy jaqsartý maqsatynda jalpy uzyndyǵy 1,3 myń km bolatyn 4 iri temirjol jobasynyń qurylysy júrgizilýde. Atap aıtqanda Dostyq – Moıynty, Almaty aınalma jelisi, Darbaza – Maqtaaral, Baqty – Aıagóz temirjol magıstraldary bar. Osynaý joldar taýar tasymaldaý men logıstıkalyq ınfraqurylymdy jaqsartý úshin strategııalyq mańyzǵa ıe bolyp otyr.
Este bolsa, ótken jyly 12 myń km avtojol jóndeýden ótse, sonyń 7 myńynda jumys máresine jetti. Qaraǵandy – Almaty, Taldyqorǵan – О́skemen, Aqtóbe – Qandyaǵash, Buqtyrma kópiri, Shamalǵandaǵy jol aıryǵy men Túrkistan óńirindegi týnel tranzıttik qozǵalystyń sapasyn edáýir arttyrdy. Bıyl jóndeý jumystary 13 myń km joldy qamtıdy. Onyń qatarynda respýblıkalyq mańyzy bar joldardyń 2 myń km-de qaıta jańǵyrtý, oblys ortalyqtary arasyndaǵy 6,6 myń jáne jergilikti joldardyń 4,2 myń km-i jóndelmek. Buıyrtsa, jospar boıynsha jyl sońyna deıin 9 myń km jolda jumys tolyq aıaqtalady degen úmit bar.
El Prezıdentiniń tapsyrmasyna sáıkes, 10 myń km tranzıttik avtojolda ortasha jóndeý jumystary jalǵasyn taýyp jatyr. Bul joba «Qazaqstan Damý Banki» arqyly qarjylandyrylǵan. Atqarylyp jatqan jóndeý jumystary óńiraralyq jáne aýdanaralyq baılanystardy túzeıdi. Ondaǵy negizgi baǵyttar – Qandyaǵash – Shalqar, Jezqazǵan – Petropavl, Atyraý – Dossor, Jańaózen – Kendirli – Túrikmenstan shekarasy, Qaraǵandy – Aıagóz.
«Ortasha jóndeý rekonstrýksııamen salystyrǵanda 7 ese arzan ári 2 ese jyldam júredi, sondyqtan bul ádis tranzıttik ınfraqurylymdy tıimdi damytýǵa múmkindik beredi. Mundaı sharalar respýblıkalyq joldardyń 94%-yn normatıvtik talaptarǵa sáıkestendirýge jol ashady. Bul óz kezeginde tranzıt aǵynyn tartýǵa, qozǵalys qaýipsizdigin arttyrýǵa jáne ekonomıkalyq tıimdilikke oń áser etedi», deıdi Kólik mınıstrligi, Avtojol komıteti tóraǵasynyń orynbasary Jambyl Baqtııar.