Memleket basshysynyń ishki týrızmniń sapasy men qaýipsizdigin arttyrý jónindegi tapsyrmalaryn júzege asyrý aıasynda Premer-mınıstrdiń orynbasary Ermek Kósherbaev Alakól kóli jaǵalaýynyń jer paıdalaný kartasymen tanysty.
Búginde kól jaǵalaýy birneshe týrıstik aımaqtan turady: Abaı jáne Jetisý oblystaryndaǵy jaǵajaılar – árqaısysy óz ereksheligi, ınfraqurylymdyq júktemesi jáne damý baǵyty bar jeke lokasııalar. Abaı oblysyndaǵy kól jaǵalaýynda vıse-premer demalýshylarmen, kásipkerlermen jáne medısına qyzmetkerlerimen kezdesip, abattandyrý nysandary men medısınalyq pýnktti qarap shyqty. Sanıtarlyq jaǵdaı, ruqsatsyz saýda, abattandyrý men qaýipsizdik máselelerine erekshe nazar aýdaryldy. Azamattar men týrısterdiń ótinishi boıynsha birqatar tapsyrma berildi. Atap aıtqanda, tamaq ónimderiniń ruqsatsyz saýdasyna qatysty sanıtarlyq-epıdemııalyq qyzmettiń tekserisin uıymdastyrý, jaǵalaýdyń tazalyǵyna baqylaýdy kúsheıtý jáne qoqysty júıeli túrde shyǵarý, demalýshylar kóp jınalatyn jerlerge qosymsha qoqys jáshikteri men konteınerler ornatý, týrıstik aımaqty turaqty baılanyspen qamtamasyz etý máselesin qarastyrý mindetteldi.
Sonymen qatar E.Kósherbaev jaǵalaý boıyndaǵy jer paıdalaný kartasymen tanysyp, qoldanystaǵy bas josparǵa taldaý júrgizýdi tapsyrdy. Kásipkerlerdiń sý aıdynyna kirýge shekteý qoıylýy jeke másele retinde qaraldy. Jergilikti atqarýshy organdarǵa buzýshylyqtardy tez arada anyqtap, azamattardyń sýǵa erkin ótýin qamtamasyz etý tapsyryldy.
Bıyl Alakól kóliniń jaǵalaýynda aýqymdy rekonstrýksııalaý jáne abattandyrý jumystary bastaldy. Oblystyq bıýdjetten 658 mln teńge bólindi, onyń ishinde, 108,9 mln teńge – Arbat alańyn jóndeýge, 171,6 mln teńge – jańa qoǵamdyq keńistik qurýǵa, 107,5 mln teńge jaǵalaýdy abattandyrýǵa baǵyttalady.
Jaǵajaıda 25 kıim aýystyrý kabınasy, 50 qoqys konteıneri, 2 bıoájethana, 10 sanıtarlyq torap (maýsym sońyna deıin 18-ge jetkiziledi) ornatyldy. 7 pırstiń úsheýi salyndy, jaryqtandyrý júrgizilip, qutqarý munaralary ornalastyryldy. Qosymsha 300 mln teńge bólindi, atap aıtqanda, 141,6 mln teńge – Kabanbaı aýylynda órt sóndirý deposynyń qurylysyna, 57,7 mln teńge – kól jaǵalaýynda qutqarý stansasy qurylysyna, 100 mln teńge týrıstik aýmaqty damytýdyń bas josparyn ázirleýge jumsalady.
E.Kósherbaev týrıstik aımaqtardy jaqsartý jumysy eldiń barlyq óńirin qamtıtyn memlekettik strategııa aıasynda júzege asyrylýy qajettigin atap ótti.
«Basty mindet – ýaqytsha sheshimder qabyldamaı, taza jaǵajaılar, qaýipsiz demalys, turaqty baılanys jáne oılastyrylǵan ınfraqurylymdy qamtıtyn ornyqty júıe qalyptastyrý. Týrızm – azamattar úshin jaıly, al óńirler úshin órkenıetti ekonomıkalyq áser ákelýge tıis», dedi vıse-premer.
Barlyq óńirde anyqtalǵan másele ortaq: qoqys jáshikteriniń jetispeýi, beıbereket saýda, baılanystyń nasharlyǵy, zańsyz qurylystar. Osyǵan baılanysty óńirlerge jasaǵan sapar qorytyndysy boıynsha týrıstik aımaqtardy josparlaýdyń standarttaryn ózgertý jáne ákimdikter men qadaǵalaý organdarymen ózara is-qımyldy kúsheıtý syndy júıeli sharalar qabyldanady. Baqylaý Úkimet deńgeıinde júzege asyrylady.