Qyzyljardyń kireberisine erekshe eskertkish ornady. Qalanyń ońtústik beketi jaǵynan oryn tepken óner týyndysy alty myń jyl buryn alǵash jylqyny Uly dalanyń osy tusynda qolǵa úıretkenin áıgileıdi.
Aspanǵa qarǵyǵan arǵymaqqa shalma tastap toqtatqan kóshpeliler óneri dalamyzda áli kúnge jalǵasyp kele jatqanyn maqtanyshpen aıtamyz. Mynaý sony beınelep tur. Asaýǵa shalma tastaý asqan qabiletti kórsetedi. Botaı qonysy mańynda jylqyǵa tuńǵysh quryq salyp, úıretken babalarymyzǵa qoıylǵan bul eskertkish qaı jaǵynan bolsyn sátti shyqqan. Tarıhı ári tanymdyq turǵydan da kelisti-aq. Asaýǵa quryq salǵan kóshpeli urpaǵynyń arqandy belge orap, qazyqtaı qatyp turǵanynyń ózi – biregeı mádenıet. Jylqyny tuńǵysh minip, álemdi tanýǵa alǵash jol salǵam dep qazdııa qalǵandaı. Atqa mingende tuıaq astynda dóńgelep qalatyn qara jerdiń shar tárizdi beınesi de umytylmapty. Jylqy, adam, jer, tóbesin aspan ǵana tuta alady... Ǵanıbetin de atqa mingender sezedi. Qaıyrly bolsyn!