Astanada «Sahnadan sálem» atty III Halyqaralyq teatr festıvaliniń shymyldyǵy ashyldy. Bul – Qazaqstan men jaqyn sheteldiń teatrlary úshin mańyzdy ári aıtýly oqıǵa. Astana kúnin toılaý aıasynda Qazaqstan, Reseı jáne Grýzııanyń jetekshi ártisteri bir apta boıy Astana teatrlarynyń sahnalarynda úzdik qoıylymdaryn qoıady. Astananyń 17 jyldyǵyn toılaý naq osy teatr aptalyǵynan bastaý almaq.
Bıyl atalǵan shara osymen úshinshi jyl qatarynan ótedi. Jyl ótken saıyn onyń aýqymy keńeıip, jańa elder men qalalardy qamtyp jatyr. Bıylǵy «Sahnadan sálemge» qatysatyn 12 ujym qalalyqtar men qonaqtarǵa sońǵy jyldardaǵy eń tańdaýly, halyqaralyq, respýblıkalyq teatr festıvaldarynda jeńimpaz atanǵan qoıylymdaryn usynady.
Sharanyń alǵashqy qoıylymy búgin Kongress-Holda ótedi. Bul týraly Qazaqstan konsert zalynda belgili Reseı akteri Sergeı Bezrýkovtyń qatysýymen ótken sharada málim boldy. Tanymal ártis jetekshilik etetin teatr kórermenge tanymal «Sırano de Berjerak» týyndysyn qoıady. Qoıylymnyń ereksheligi zattar men áreketter yqsham túrde sózben beınelenip otyrmaq. Bul kórý qabiletteri nashar jáne zaǵıp 20 kórermenge spektakldi tolyq qabyldaýǵa múmkindik beredi. Basty róldi Sergeı Bezrýkov somdaıdy. Kıno týraly aıtpaǵannyń ózinde, Sergeı Esenın, Aleksandr Pýshkın, tipti, aty ańyzǵa aınalǵan bard ánshi Vladımır Vysoskııdi sheber somdap, kórermen yqylasyna bólengen Sergeı Bezrýkovtyń astanalyq jankúıerleri súıikti akterlerimen júzdesýge asyq. Aıta keteıik, bul Bezrýkovtyń Astanadaǵy alǵashqy qoıylymy emes.
Munymen qosa, festıval aıasynda A.Grıboedov atyndaǵy Tbılısı Memlekettik akademııalyq orys drama teatry óner kórsetedi. M.Gorkıı atyndaǵy Memlekettik akademııalyq orys drama teatrynyń sahnasynda ártister L.Tolstoıdyń povesine negizdelgen qoıylymdy sahnalamaq.
Qazaq tilindegi qoıylymdardy Aqtaý, Aqtóbe, Almaty, Astana, Petropavl, Taldyqorǵan jáne Túrkistannyń teatrlary usynady.
Raýshan TÁÝIRHANQYZY,
jýrnalıst.