Almatynyń «Alataý» dástúrli óner teatry Máskeý sahnasynda ulttyq ónerdiń mereıin ústem etti. Atalǵan óner teatry A.P. Chehov atyndaǵy XVII Halyqaralyq teatr festıvalinde «Mámlúk. Sultan Beıbarys» qoıylymyn sátti sahnalady. Kórermender spektakldi zor yqylaspen tamashalap, uzaq qol soǵyp, qoshemet kórsetti.
Sahnada 85 adam óner kórsetti. Rejısser Farhad Moldaǵalı qoıǵan spektaklde jas sultan Beıbarystyń rólin «Daryn» memlekettik jastar syılyǵynyń laýreaty Áset Esjan somdasa, eresek Beıbarys keıpine belgili artıst Ońdasyn Besikbasov endi.
Bıyl XVII A.P.Chehov atyndaǵy Halyqaralyq teatr festıvaline Qazaqstan, Qytaı, Brazılııa, Úndistan, Ońtústik Afrıka Respýblıkasy, Iran, Armenııa, Argentına, Kolýmbııa jáne Bahreın teatrlary qatysyp jatyr. Munda kórermenge usynbas buryn uıymdastyrýshylar ár spektakldi muqııat iriktep, úzdikterin ǵana tańdaıdy. Bıyl «Alataý» dástúrli óner teatry Qazaqstannan shaqyrtý alǵan jalǵyz ujym eken.
«Alǵash ret teatrlandyrylǵan saýndrama janryn tamashaladym. Bir jarym saǵat kózdi ashyp-jumǵansha óte shyqty. Mossovet teatry sahnasynda qazaqtyń naızasy men baltasy jarq etti. Buǵan deıin bul sahnadan Chehov pen Pýshkın týyndylaryn ǵana kórip kelgen edik. Al «Mámlúk» – múlde ózgeshe dúnıe. Tarıh tirilip, júrekke jetti. Saýndrama janry mindetti túrde jalǵasyn tabýy kerek. Qoıylym sońynda kórermender akterlerdi jibergisi kelmedi. Munyń aıǵaǵy on mınýttyq tolassyz shapalaq» deıdi «Mır» telekanalynyń tilshisi Roman Belýkov.
Qoıylymda sóz az, qımyl, plastıka, bı jáne tiri mýzyka emosııaǵa toly. Janry da, baıandaý tásili de ózgeshe. Keń tynysty bul týyndy poetıkalyq formada órilip, zamanaýı rejısserlik sheshimmen daralanǵan. Kórkem poetıkalyq baıandaýǵa qurylǵan.
«Mámlúk. Sultan Beıbarys» spektakliniń kórsetilimi A.P.Chehov atyndaǵy Halyqaralyq teatr festıvaliniń shyn mánindegi aıtýly oqıǵasyna aınaldy. Bul — qazaq teatrynyń zamanaýı tarıhyndaǵy aıshyqty, erekshe beles. Qoıylymda halyqtyń rýhyn kóteretin tarıh pen búgingi teatr óneriniń ozyq tásilderi sheber úılesim tapqan. Máskeý kórermeni eki kún boıy ornynan tik turyp qoshemet kórsetti. Bul – ortaq eńbektiń, mádenı úndestiktiń jarqyn jemisi», dedi A.P.Chehov atyndaǵy Halyqaralyq teatr festıvaliniń bas dırektory Karına Satýrova.
Inara ÁÝBÁKIROVA,
«Alataý» dástúrli
óner teatry Ádebıet bóliminiń basshysy
ALMATY