ASTANA. 19 naýryz. Búgin Almatyda Qazaqstannyń bir top balǵyn fýtbolshylaryn Brazılııa akademııasynda oqýǵa shyǵaryp salý rásimi boldy. Bul týraly Sports.kz habarlady.
Erteń, 20 naýryz kúni elimizdiń 2000 jyly týǵan 26 balǵyn fýtbolshylary Brazılııanyń «Krýzeıro» komandasyna attanady. Olar osy elde 3 jyl fýtbol oıynynyń qyr-syryn meńgerip, maman fýtbolshy retinde elge oralady dep kútilýde.
Balalar uzaq jolǵa attanar aldynda Almatyǵa Brazılııa akademııasynyń vıse-prezıdenti men ókili keldi. Balalardyń jol júrýlerine arnalǵan saltanatty sharanyń barysynda meımandar Brazılııadaǵy fýtbol akademııasy týraly aıtyp berdi.
«Bizdiń akademııada úsh jyl oqyǵannan keıin olardyń kóńilderinde óte jaqsy áser qalady. Olar úsh jylda eresek adam, kásibı fýtbolshy bolyp oralady. Sizder naǵyz erkek bolyp qaıtasyzdar. Bálkim, aralaryńyzdan uly fýtbolshy da shyǵatyn shyǵar», - dedi «Krýzeıro» fýtbol klýby akademııasynyń vıse-prezıdenti Rodrıges Sılva.
Fýtbolshylarǵa Qazaqstan fýtbolynyń ókilderi de tilek bildirdi. «Sizder – Qazaqstan fýtbolynyń úmiti men bolashaǵysyzdar. Búgin keleshektegi kásibı fýtbolǵa alǵash ret qadam jasaǵaly otyrsyzdar. Qazaqstan fýtbol federasııasynyń atynan sizderdi osy bastamalaryńyzben quttyqtaǵym keledi. Brazılııa akademııasynda oqý – úlken múmkindikterdiń bastaýy. Men keleshek sizderdiń bárińizdi premer-lıgadan kóremiz degen úmittemin», - dedi federasııa vıse-prezıdenti Seıilda Baıshaqov.
Damır Qojamqul.