Sonaý Sıngapýrdan kelgen týrıst qyz Ile Alataýy memlekettik ulttyq tabıǵı parkiniń aýmaǵyndaǵy Sátpaev shyńyna kóterilgen kezde zaqym alǵany týraly Almaty qalalyq qutqarý qyzmetiniń resmı paraqshasynda jarııalandy, dep habarlaıdy Egemen.kz.
Sátpaev shyńy (burynǵy Sovetter shyńy) - Josaly kezeń asýynan soltústikke qaraı 4317 metr bıiktikte ornalasqan, mańynda «Kosmostansııa» ǵylymı stansasy bar. Sátpaev shyńy - kúrdeliligi jaǵynan 1A sanatyna jatatyn, alpınıster jıi betke alatyn baǵyt.
Sıngapýrlyq týrıst qyzdy izdep-tabý, alǵashqy kómek kórsetý operasııasyna Almaty №4 qalalyq klınıkalyq aýrýhanasynyń travmatolog-ortopedi Konstantın Morozov qatysty. Qutqarýshylar oqıǵa ornyna jetip, Almaty qalalyq alpınızm federasııasynyń nusqaýshylarymen birge zardap shekken adamǵa alǵashqy medısınalyq kómek kórsetip, ony tómen túsirýdi bastady. Keıinirek ony aýrýhanaǵa jetkizý úshin «Aıýsaı» vızıt-ortalyǵynan joǵary ornalasqan ótkelge jedel járdem brıgadasy shaqyrtyldy.
«Senbi kúni Sátpaev shyńynyń eteginde júrgenimizde, taýdyń bir qıyn tusynda tótenshe jaǵdaı bolǵany týraly habar tústi. Biz Almaty qalalyq alpınızm federasııasynyń nusqaýshylarymen dereý oqıǵa ornyna bet aldyq. Zardap shekken adam muzdyq jartastan syrǵyp qulaǵan eken. Jaǵdaıyn baǵalap, qanyn toqtatyp, jarasyn tańdyq, sodan soń ony bazalyq lagerge túsirdik. Sheteldik alpınıst jabyq bas-mı jaraqatyn alǵan, mańdaı-samaıynda qolynda jaralanǵan. Jaǵdaıy birqalypty boldy. Ony TJM qyzmetkerlerine tapsyrdyq, olar óz kezeginde jedel járdem brıgadasyna jetkizdi», deıdi Almaty №4 qalalyq aýrýhanasynyń travmatolog-dárigeri Konstantın Morozov.
Naýqas Ortalyq qalalyq klınıkalyq aýrýhanaǵa jetkizilip, barlyq qajetti aspaptyq tekserýden ótti. Ol shuǵyl gospıtalızasııany qajet etpegendikten, ambýlatorlyq emdelýge jiberildi.
Al Konstantın Rashıduly travmatologııa men ortopedııa salasynda 30 jyldyq tájirıbesi bar maman. Ol táýlik boıy jumys isteıtin qabyldaý bóliminiń dárigeri retinde eń kúrdeli ýchaskede qyzmet atqarady. Osy jyldar ishinde ol myńdaǵan tótenshe jaǵdaılarǵa aralasqan.
Bos ýaqytynda volonter retinde taýly aımaqtarda ekspedısııalarǵa qatysyp, alpınısterge serik bolady, taýda alǵashqy kómek kórsetý boıynsha sabaq ótkizedi.
«Alpınızmmen aınalysqanyma 20 jyldan asty. Taýǵa jıi shyǵamyn, túrli ekspedısııalarǵa qatysamyn. Alpınısterge jolserik bolamyn, nusqaýshylarǵa alǵashqy kómek kórsetý boıynsha dáris oqımyn. Alǵashqy kómek qobdıshasy únemi ózimmen birge: bıiktikke arnalǵan, joryqqa arnalǵan jáne keıde stasıonarlyq jınaq ta bolady. Jańa týrıster eń kóp jiberetin qatelik - óz kúshin durys baǵalamaý men qaýipsizdik erejelerin elemeý», deıdi №4 qalalyq klınıkalyq aýrýhananyń dárigeri Konstantın Morozov.
Qalalyq qutqarý qyzmeti onyń izdestirý-qutqarý jumysyna qosqan úlesin erekshe atap ótti.
Qalalyq qutqarý qyzmeti óz aqparattyq resýrsynda taýly aımaqtarǵa shyǵatyn týrısterge qaýipsizdik sharalaryn saqtaýdy jáne joryqqa shyǵar aldynda jaqyndaryn nemese qutqarý qyzmetin josparlanǵan baǵyttan habardar etýdi umytpaý kerek ekenin eske salady.