Almaty qalasy aglomerasııa esebinen jyl sanap qulashyn keńge jaıyp barady. Sol turǵyda megapolıste iri jobalardy júzege asyrýda eski úılerden qutylý men súrip tastaýdyń kókeıkestiligi kún saıyn artyp keledi. Bul jumystar qala ákimdiginiń arnaýly josparyna sáıkes júıeli júrgizilip jatyr.
Aıtalyq, 2025 jyldyń I jartyjyldyǵynda Almatydaǵy 220 eski turǵyn úı ıeleri jańa da jaıly páterge kóshti. Qonys aýdarý jumystaryn Almaty qalasy ákimdiginiń «Almaty» ÁKK enshiles uıymy, «Qalalyq kúrdeli qurylys kásiporny» JShS men ınvestorlar «Almaty qalasynyń turǵyn úıdi jańartý baǵdarlamasy – 2030» aıasynda júzege asyryp jatyr.
Almatylyqtar jańa baspanany «bólme ornyna bólme» qaǵıdatymen nemese burynǵy turǵyn úıiniń naryqtyq qunyna sáıkes ótemaqy alý arqyly ıelenip otyr. Jańartý baǵdarlamasy aıasynda barlyq páter tolyq árlenip, daıyn kúıinde berildi. Úılerge ınternet jelisi tartylyp, órtke qarsy dabyl júıesi, santehnıka, faıans, gaz nemese elektr plıtasy ornatylǵan.
Sóıtip, qalanyń eń turǵyny kóp Túrksib aýdanynda – 99, Almaly aýdanynda – 57, Jetisý aýdanynda – 32, Áýezov aýdanynda – 20, Bostandyq aýdanynda – 7, Alataý aýdanynda – 3, Medeý aýdanynda 2 adam jańa páterge qonystandy.
Baǵdarlamaǵa sáıkes barlyq menshik ıeleriniń kelisimimen ǵana kóshirilip, ǵımarattary súriledi. Erekshe kútimdi qajet etetin adamdarǵa birinshi qabattan nemese jedelsaty, pandýsy, kedergisiz qoljetimdiligi bar úılerden páter qarastyrylǵan. Qala turǵyndarynyń qaýipsizdigin qamtamasyz etý maqsatynda qamys úıler men tektonıkalyq jaryq aımaǵynda ornalasqan ǵımarattardy súrýge erekshe kóńil bólinedi.
Berilgen baspanaǵa kóshýden bas tartqan jaǵdaıda turǵyndar eski úıde tura beredi, biraq yqtımaldy qaýip-qaterlerge ózderi jaýapty bolady. Bıyl jyl sońyna deıin «Qalalyq kúrdeli qurylys kásiporny» men ınvestorlardyń kúshimen taǵy 600-den astam adamdy jańa turǵyn úımen qamtamasyz etý josparlanyp otyr.
«Jańartý baǵdarlamasy keshendi tásilge negizdelgen. Turǵyn úı ǵana emes, sonymen birge qala turǵyndarynyń ómir salty ózgeredi. Jaıly orta qalyptasyp, jańa qoǵamdyq keńistikter, jumys oryndary men qyzmetter paıda bolady. Sonymen qatar Almatynyń sáýlettik kelbeti jańarady. 2030 jylǵa deıin qaladaǵy eski úılerdiń sanyn 1 366-dan 690-ǵa deıin azaıtyp, shamamen 7 500 menshik ıesin zamanaýı páterge kóshirý josparlanyp otyr», dedi «Qalalyq kúrdeli qurylys kásiporny» JShS basqarma tóraǵasy Rınat Qurmanov.
«Almatynyń turǵyn úıdi jańartý baǵdarlamasy – 2030» qalalyq ákimdik tarapynan ázirlenip, 2024 jyldyń qarasha aıynda máslıhatta bekitilgen. Baǵdarlamaǵa «Almaty» ÁKK» AQ ákimshilik etse, ýákiletti uıym retinde qala ákimdiginiń «Qalalyq kúrdeli qurylys kásiporny» JShS jumys istep otyr.
ALMATY