Ortalyq kommýnıkasııalar qyzmeti alańynda ótken brıfıngte Qarýly Kúshterdiń sıfrlyq transformasııalaýdaǵy eleýli jetistikteri tanystyryldy. Mundaı bastamalardyń maqsaty – ákimshilik úderisterdi jeńildetý, áskerıler qyzmetiniń tıimdiligin arttyrý ári sapasyn jaqsartý.
Qorǵanys mınıstriniń orynbasary Darhan Ahmedıev Qorǵanys mınıstrligi Áskerı bilim berý jáne merzimdi áskerı qyzmetke shaqyrý júıesine sıfrlyq sheshimderdi belsendi engizip jatqanyn habarlady.
«Smart voenkomat» – áskerı esepte turǵan shaqyrylýshylardyń jalpy sanynan áskerge shaqyrý jasyndaǵy azamattardy irikteý. Jasandy ıntellekt belgili bir krıterııler men buryn áskerge shaqyrylǵandardyń málimetter bazasy negizinde jedel áskerı qyzmetke shaqyrylýǵa tıis azamattardy ǵana habardar etpek.
Endi áskerı oqý oryndaryna túsý úshin qujattardy onlaın – e-Gov portaly arqyly tapsyrýǵa bolady. Búginde pysyqtalǵany – 22 memlekettik qyzmet. Odan bólek, bul servıs arqyly buryn shyǵyp ketken oqýyn qaıta qalpyna keltirý qyzmeti de qoljetimdi (16 memlekettik qyzmet). Aldyn ala medısınalyq kýálandyrý joıyldy, arnaıy tekserý qashyqtan júrgiziledi.
Qorǵanys mınıstrliginiń sıfrlyq transformasııa sheńberindegi negizgi jetistikteriniń biri – barlyq áskerı oqý oryndaryna arnalǵan «Askeri Ziyat» áskerı-bilim berý kópfýnksıonaldy platformasyn qurý. Bul platforma áskerı mamandardy daıarlaýdy júzege asyratyn áskerı joǵary oqý oryndary men áskerı kolledjderdi biryńǵaı sıfrlyq keńistikke biriktiredi, qaraý rejiminde syrtqy uıymdar úshin de qoljetimdi vedomstvoaralyq elektrondyq kitaphanasy da bar. Munda 20 baǵytta daıyndyq kýrstary ótkiziledi. Búginde myńnan asa áskerı qyzmetshi tirkelgen. 300-den astamy oqýdy oıdaǵydaı aıaqtap, belgilengen úlgidegi sertıfıkattarǵa ıe boldy.
Úshinshi jyly iske asyrylyp jatqan «Sarbaz 2.0» jobasy boıynsha jumys jalǵasyp jatyr. Joba aıasynda merzimdi qyzmettiń áskerı qyzmetshileri memlekettik bilim berý granttary arqyly tegin oqı alady. Jyl basynan beri onlaın-testileý ótkizildi, testke qatysýǵa 10 myńnan asa sarbaz nıet bildirdi. Bıyl mamyr aıynda 2 010 sarbaz elimizdiń joǵary oqý oryndarynda oqý úshin memlekettik granttar aldy.
Memleket basshysynyń jasandy ıntellektti keńinen engizý týraly tapsyrmasyna sáıkes Qorǵanys mınıstrligi Armia.kz servısin ázirledi. Bul kiriktirilgen JI qazirdiń ózinde 2 myńnan asa suranysty óńdep, áskerı qyzmet týraly aqparattyń ámbebap kózine aınaldy. Memlekettik organdar arasynda alǵashqylardyń biri bolyp Qorǵanys mınıstrliginiń mamandary Ulttyq jasandy ıntellekt platformasyna negizdelgen Armia.kz servısiniń JI-assıstentin qurdy. Bot keń kólemdi bilim bazasyna ıe jáne zańnamadaǵy ózgeristerge jedel beıimdele alady. Ol áskerı qyzmetke qatysty suraqtar boıynsha «sıfrlyq keńesshi» retinde jumys isteıdi.
Buǵan qosa Qorǵanys mınıstrligi áskerge shaqyrýdy, qorǵanys qabiletin jaqsartýdy jáne jaýyngerlik daıyndyqty ońtaılandyrýdy kózdeıtin, qorǵalǵan segmentte jasandy ıntellektti qoldanatyn birqatar jobany júzege asyryp jatyr.