Taıaý Shyǵystaǵy geosaıası ahýaldyń kúrt ýshyǵýyna baılanysty Qazaqstan azamattaryn elge qaıtarý operasııasyna jumsalǵan qarajat kólemi ázirge belgisiz. Kólik vıse-mınısti Talǵat Lastaev bul máselege qatysty pikir bildirip, qazirgi ýaqytta qarjylyq esepteýler júrgizilip jatqanyn málimdedi, dep habarlaıdy Egemen.kz.
Vıse-mınıstrdiń aıtýynsha, evakýasııalaý kezinde memleket úshin basty basymdyq shyǵyn kólemi emes, azamattardyń qaýipsizdigi men olardy qaýipti aımaqtan jedel shyǵarý bolǵan.
«Sol sátte eshkim shyǵyn kólemi nemese baǵasy týraly oılaǵan joq, negizgi mindet – adamdardy aman-esen jetkizý boldy. Áýe kompanııalary jedel iske kiristi. Evakýasııanyń qunyn esepteý basty maqsat emes edi. Barlyǵymyz azamattardy qaýipsiz jerge alyp shyǵý úshin jumyldyq», dep túsindirdi Talǵat Lastaev.
Mınıstrlik ókili áýe kompanııalary men jaýapty organdar atqarylǵan jumystyń naqty qunyn eseptep jatqanyn, barlyq derekter tolyq jınaqtalǵan soń sıfrlardyń kópshilikke jarııalanatynyn jetkizdi. Sonymen qatar ol otandyq jáne sheteldik áýe kompanııalaryna, áýejaı qyzmetkerlerine qıyn kezeńde kórsetken kásibıligi men jedeldigi úshin rızashylyǵyn bildirdi.
Taıaý Shyǵys aımaǵynan 10 000-nan astam otandasymyz qaıtaryldy
Aımaqtaǵy turaqsyzdyqqa baılanysty qazaqstandyq áýe tasymaldaýshylary Taıaý Shyǵys baǵytyndaǵy reısterdi ýaqytsha toqtatty. Qazirgi ýaqytta Qatar men Saýd Arabııasyna ushatyn ushaqtar da reıske shyǵyp jatqan joq. Dese de, keıbir sheteldik kompanııalar, atap aıtqanda FlyDubai, ushýdy jalǵastyrǵan. Biraq áýe keńistigindegi qaýip seıilmegendikten, Dýbaı áýejaıynyń ózi jumysyn jıi toqtatýǵa májbúr bolyp otyr.
Vıse-mınıstr ushý qaýipsizdigi men aımaqtaǵy jalpy jaǵdaı kúndelikti saralanyp otyratynyn, aldaǵy sheshimder tek qaýip-qaterdi jan-jaqty baǵalaǵannan keıin ǵana qabyldanatynyn qadap aıtty. Esterińizge sala keteıik, buǵan deıin Air Astana áýe kompanııasy naýryz aıynyń sońyna deıin Dýbaıǵa reısterin toqtatqanyn habarlaǵan bolatyn.
Eske sala keteıik, Izraıl 28 aqpanda tańerteń Iranǵa soqqy jasady. Dýbaı, Abý-Dabı jáne Ras-el-Haımada júrgen Qazaqstan azamattary reısterdiń toqtatylýyna baılanysty elge qaıta almaı qalǵan. Al «Qazposhta» Taıaý Shyǵystaǵy jaǵdaıdyń shıelenisýine baılanysty halyqaralyq poshta jóneltilimderine ýaqytsha shekteýler qoıylǵanyn málimdedi.
Buǵan deıin Taıaý Shyǵystaǵy qaqtyǵys saldarynan 13 reıs toqtatylǵanyn jazǵan bolatynbyz. Sondaı-aq Taıaý Shyǵystaǵy ahýaldyń ýshyǵýyna baılanysty Qazaqstannyń shet elderdegi mekemeleriniń jedel baılanys jáne «jedel jeli» nómirleriniń iske qosylǵany habarlanǵan edi.