Astanada LRT jelisi iske qosyla salysymen kelesi kúni jelide 30 mınýtqa sozylǵan tehnıkalyq kidiris tirkeldi. Buǵan jolaýshylardyń qaýipsizdik erejelerin buzýy sebep bolǵan. Osyǵan baılanysty kompanııa ókilderi jolaýshylarǵa qaýipsizdik erejelerin saqtaý qajettigin eskertedi, dep habarlaıdy Egemen.kz.
Kompanııa qyzmetkerleriniń aıtýynsha, LRT júıesi tolyq avtomattandyrylǵan, Sondyqtan mundaı áreketter júıe tarapynan qaýip retinde qabyldanyp, qozǵalys avtomatty túrde toqtatylady.
«Bir bıletpen tek bir adam ǵana ótýi tıis, eki adamnyń bir týrnıketten birge ótýine tyıym salynady. Mundaı áreket týrnıket mehanızminiń zaqymdanýyna nemese jolaýshynyń jaraqat alýyna sebep bolýy múmkin, deıdi «Báıterek» beketiniń basshysy Ermek Sydyqov.
Kompanııa barlyq zań buzýshylyqtar beınebaqylaý kameralaryna jazylatyndyǵyn habarlady. Bul derekter polısııaǵa berilip, kináliler zań aldynda jaýapqa tartylady.
«LRT iske qosylǵannan beri jolaýshylar sany artyp, 180 myń adamǵa jetken. Al keshe bir kúnde 100 myńǵa jýyq jolaýshy tasymaldanǵan. Bul jobalyq ótkizý múmkindiginen joǵary kórsetkish», dep atap ótken City Transportation Systems kompanııasynyń basqarma tóraǵasy Asylbek Dúısebaev jolaýshylardy qaýipsizdik erejelerin saqtaýǵa shaqyrdy.
Eske sala keteıik, LRT júıesi 16 mamyrdan bastap iske qosyldy. Al kelesi kúni jolaýshylardyń qaýipsizdik erejelerin saqtamaýynan júıe 30 mınýtqa toqtap qalǵan edi.