Qyzylorda qalasynda qutqarýshylar terezeden qulap ketkeli turǵan balany qutqaryp qaldy, dep habarlaıdy Egemen.kz.
Qyzylorda qalasy Chaıkovskıı kóshesinde bes qabatty turǵyn úıdiń úshinshi qabatyndaǵy páter terezesinde kishkentaı balanyń otyrǵany jáne onyń qulap ketý qaýpi bar ekeni týraly habarlama túsken.
Oqıǵa ornyna jedel jetken qutqarýshylar úsh ıindi satynyń kómegimen ashyq tereze mańynda turǵan balany qutqaryp aldy.
«Oqıǵa kezinde páterdiń esigi qulyptaýly bolǵan, ata-anasy úıde bolmaǵan. Shamamen 4 jastaǵy bala polısııa qyzmetkerlerine tapsyryldy», delingen aqparatta.
Tótenshe jaǵdaılar mınıstrligi ata-analarǵa kishkentaı balalardy qaraýsyz qaldyrmaýdy jáne terezelerge arnaıy qorǵanys quraldaryn ornatýdy eskertedi.
Eske salaıyq, byltyr Astanada 14 bala terezeden qulap, kóz jumǵan.