О́ner men elge qyzmet etýdiń, ult mereıin ósirýdiń jaýapty joly bar. Sol jol kenetten úzilse, halyq qaıǵyrady, úlken sahna tulǵasyn joqtaıdy.
Keshe kórnekti opera ánshisi, «Astana Opera» teatry opera trýppasyn basqarǵan tulǵa, rejısserlik bólimniń qyzmetkeri, Qazaqstannyń eńbek sińirgen qaıratkeri Baıǵalı Mombekov 69 jasqa qaraǵan shaǵynda dúnıe saldy.
1956 jyly Túrkistan oblysy Saryaǵash aýdanynda týǵan ónerpaz Qurmanǵazy atyndaǵy Almaty memlekettik konservatorııasynyń ánshilik fakýltetin 1986 jyly bitirgen, operalyq jáne kameralyq ánshi, pedagog. 1999 jyldan Abaı atyndaǵy memlekettik akademııalyq opera jáne balet teatrynyń solısi, keıin K.Baıseıitova atyndaǵy Ulttyq opera jáne balet teatrynyń solısi retinde qazaq ónerine qyzmet etken tenor ánshi tyńdarmannyń júregin izgilikke, nazǵa, ásemdikke bóledi. О́zi «árbir romans tereń sezimge toly aqparat beredi. Bul mýzyka tyńdarmandy meıirimdilikke, qarym-qatynastaǵy tazalyqqa tárbıelep, adamdy lırıkalyq úılesimdilikke baǵyttaıdy. Bizdiń konsertimizge kelgen kórermende mindetti túrde pozıtıvti sezim paıda bolady, olar jaqsy kóńil kúıden qýat alady» degenindeı, kóńil tebirente shyrqaǵan romanstary el júreginen óshpek emes.