«Intergaz Ortalyq Azııa» AQ bas dırektory Manas Tasybaev «Taldyqorǵan – Úsharal» magıstraldyq gaz qubyryn salý boıynsha ınvestısııalyq jobanyń júzege asý barysymen tanysty. Búginde qubyrdyń magıstraldyq bóligi tolyqtaı aıaqtaldy. Tehnologııalyq qubyrlar men jabdyqtarǵa beriktik pen germetıkalyq tózimdiligine qatysty gıdravlıkalyq synaqtar sátti júrgizildi.
Qazirgi ýaqytta bir mezgilde 6 avtomattandyrylǵan gaz taratý stansasynyń (AGTS) qurylysy belsendi túrde júrip jatyr. Olar: «Qapal», «Jansúgirov», «Sarqan», «Qoılyq», «Qabanbaı», «Úsharal». Atalǵan 6 stansanyń ishinde 4-eýi – «Qapal», «Jansúgirov», «Sarqan» jáne «Úsharal» – beriktik pen germetıkalylyqqa synaqtan sátti ótti. Bul – qysymmen jumys isteıtin jabdyqtardyń qaýipsizdigi men senimdiligin qamtamasyz etýdiń mańyzdy qadamy.
Jospardan alda kele jatqan qurylys jumysyna 126 arnaıy tehnıka birligi tartylǵan. 288 jumysshy eńbek etip jatyr. AGTS-terdiń jalpy daıyndyǵy 74% dep baǵalanady. Gaz qubyryn paıdalanýǵa berý 2025 jylǵy tamyzǵa josparlanyp otyr. Qubyrdyń uzyndyǵy – 302,441 km. Jobalyq qysym – 9,8 MPa. Joba aıasynda 6 gaz qubyry-burmasy men 6 avtomattandyrylǵan gaz taratý stansasy salynyp jatyr.
Joba Memleket basshysynyń tapsyrmasymen qolǵa alynǵan. Gaz qubyrynyń qurylysy 2024 jylǵy tamyzda Premer-mınıstr Oljas Bektenovtiń Jetisý oblysyna jumys sapary barysynda bastalǵan edi.
Jobany iske asyrý nátıjesinde Aqsý, Sarqan jáne Alakól aýdandarynyń 66 eldi mekeninde turatyn 134 myńnan astam turǵyn tabıǵı gazǵa qosylý múmkindigine ıe bolady. Bul óz kezeginde kásipkerlik belsendiliktiń artýyna, shaǵyn jáne orta bıznestiń damýyna, sondaı-aq jańa jumys oryndarynyń ashylýyna múmkindik beredi.