Qytaı men Eýropa arasyndaǵy tranzıtti qamtamasyz etý boıynsha Qazaqstan asa mańyzdy ról atqarady. El aýmaǵy arqyly Shyǵys Azııanyń óndiristik klasterlerin Eýropanyń tutyný naryqtarymen baılanystyratyn strategııalyq temirjol jáne mýltımodaldy marshrýttar ótedi, dep habarlaıdy Egemen.kz.
Halyqaralyq kólik bastamalaryn iske asyrý sheńberinde shyǵys shekaralarynda shekaralyq ótkelder belsendi damyp jatyr, «Qorǵas – Shyǵys qaqpasy» sııaqty qurǵaq porttardyń qýaty keńeıip keledi jáne Kaspıı óńiriniń porttaryn qosa alǵanda, batysta ınfraqurylym kúsheıtilip jatyr.
Ishki termınaldyq jelini damytýmen qatar Qazaqstannyń sheteldik júk quraýshy núktelerde bolý geografııasyn keńeıtý jóninde sharalar qabyldanyp otyr. Lıanıýngan portynda jáne Sıan qalasynyń qurǵaq portynda Qazaqstan-Qytaı termınaldary jumys isteıdi, sondaı-aq otandyq jeke sektor Potı portynda termınal turǵyzdy.
Zamanaýı logıstıkalyq habtardy qurý jáne halyqaralyq kólik dálizderimen ıntegrasııalaý Qazaqstandy jahandyq jetkizý tizbeginiń mańyzdy bóligine aınaldyrady.
Úkimettiń osy saladaǵy júıeli jumysy elge óziniń geografııalyq jaǵdaıynan ekonomıkalyq paıda alyp qana qoımaı, tranzıttik damýdyń turaqty modelin qalyptastyrýǵa múmkindik beredi.