Almatyda Qazaqstan Respýblıkasynyń Memlekettik keńesshisi Erlan Qarınniń tóraǵalyǵymen «Qazaqstan tarıhy: ejelgi dáýirden búginge deıin» atty jeti tomdyq akademııalyq basylymdy ázirleýge qatysty redaksııa alqasynyń kezekti otyrysy ótti.
Jıynda redaksııa alqasy birinshi tomdy bekitip, ony basyp shyǵarýǵa ázirleý týraly ortaq sheshim qabyldady.
Sonymen qatar redaksııa alqasy akademııalyq basylymnyń ekinshi tomynyń mazmunyn talqylady.
Avtorlar ujymynyń jetekshisi, tarıh ǵylymdarynyń doktory, Ulttyq ǵylym akademııasynyń akademıgi Bolat Kómekov basylymnyń tujyrymdamasy, mazmuny jáne qurylymy týraly baıandap, «Túrik dáýiri» dep atalatyn ekinshi tomnyń erekshelikteri men jańalyqtaryn atap ótti. Ulttyq ǵylym akademııasynyń akademıkteri Mámbet Qoıgeldıevtiń, Orazaq Smaǵulovtyń, tarıh ǵylymdarynyń doktorlary Erkin Ábildiń, Aıbolat Kóshkimbaevtiń, Galına Ksenjıktiń resenzııasy tyńdaldy. Sondaı-aq Merýert Ábýseıitova, Búrkitbaı Aıaǵan, Aıgúl Sádýaqasova, Jaqsylyq Sábıtov, Radık Temirǵalıev, Dıhan Qamzabekuly, Aqan Ońǵar, Kúlǵazıra Baltabaeva, Nursan Álimbaı, Zııabek Qabyldınov, Jáken Taımaǵambetov sııaqty redaksııa alqasynyń ózge múshesi de óz oıyn ortaǵa saldy.
Jıyn sońynda redaksııalyq alqa «Qazaqstan tarıhy: ejelgi dáýirden búginge deıin» atty jeti tomdyq akademııalyq basylymnyń ekinshi tomyn jetildirý jumysyn jalǵastyrý týraly jáne kelesi otyrysta basylymnyń úshinshi tomyn qarastyrý jóninde sheshim qabyldady.