«Ǵylym ordasynda» Abaı Qunanbaıulynyń týǵanyna 180 jyl tolýyna oraı «Ádebıet – dostyq kópiri» taqyrybynda kórme ótti.
Iran Islam Respýblıkasynyń Almaty qalasyndaǵy bas konsýldyǵy jáne mádenı ókildigimen birlesip ótkizgen is-shara hakimniń muralaryn dáripteýge, adamzattyq qundylyqtarǵa negizdelgen ıdeıalaryn halyqaralyq deńgeıde nasıhattaýǵa arnaldy.
Qazaq-ıran ádebı baılanysyn nyǵaıtýǵa, eki el arasyndaǵy mádenı yntymaqtastyqty jańa deńgeıge kóterýge baǵyttalǵan is-sharaǵa bas konsýl Sýna Ahmadı, Iran mádenı ókildiginiń basshysy Hosseın Aǵazade, sondaı-aq Irandaǵy qazaq dıasporasynyń ókilderi qatysty.
– Aqynnyń 180 jyldyǵy – onyń rýhanı jáne ádebı murasyn jańa qyrynan tanyp, zerdeleýge múmkindik beretin mańyzdy kezeń. Abaı qazaq jazba ádebıetiniń negizin qalaýshy ǵana emes, ulttyq oı-sana men mádenıettiń rámizine aınaldy. Shyǵarmalary ádebıettanýmen qatar, fılosofııa, tarıh, til bilimi jáne mádenıettaný salalarynda keńinen zerttelip keledi. Osy oraıda, «Ǵylym ordasy» Ortalyq ǵylymı kitaphanasynyń qorynda saqtalǵan sırek basylymdar men qoljazbalar – úlken ǵylymı mańyzǵa ıe. Bul materıaldar Abaı stılin, jazba tiliniń damýyn jáne shyǵarmalarynyń taralýyn zertteýge mol múmkindik beredi, – dep atap ótti «Ǵylym ordasynyń» bas dırektory Ular Muqajanov.
Kórmege «Ǵylym ordasynyń» sırek kitaptar qoryndaǵy basylymdar, hakimniń parsy tilindegi aýdarmalary, 500 bettik «qazaq-parsy» sózdigi, taǵy da basqa shyǵarmalary qoıylyp, uly aqynnyń óleńderi qazaq jáne parsy tilderinde oqyldy.
Kezdesý barysynda qatysýshylar Abaı murasyn parsy tiline aýdarǵan belgili jazýshy, qazaq ádebıetin Iran jurtshylyǵyna keńinen tanytqan kórnekti tulǵa Qajy Muhammed Shadkamdy eske aldy. Sondaı-aq Abaı óleńderin mánerlep oqý baıqaýynyń jeńimpazdary marapattalyp, arnaıy syılyqtar tabystaldy. Temirbek Júrgenov atyndaǵy Qazaq ulttyq óner akademııasy stýdentteriniń «Abaı – Rýdakı» dostyq kilemi men basqa da týyndylary kópshiliktiń nazaryna usynyldy.
ALMATY