Búgin Oral qalasyndaǵy №52 jalpy bilim beretin mektepte «Keleshek mektepteri» jobasy aıasynda «Balaqaılar mektebi» taqyrybynda baspasóz týry ótti, dep habarlaıdy Egemen.kz. BQO ákimdiginiń málimetine silteme jasap.
Is-shara barysynda pedagogtar men ata-analar bastaýysh synyptardy jańa formatta oqytý tájirıbesimen bólisti.
«Balaqaılar mektebi» – mektep tabaldyryǵyn alǵash attaıtyn búldirshinderdi beıimdeýge arnalǵan mańyzdy joba. Qazirgi tańda mektebimizde 1480 oqýshy bilim alyp jatyr, onyń ishinde 172 bala 1-synypqa ótinish berip, 156 bala daıyndyq kýrsyna qatysyp jatyr. Bul kýrs balalardyń tanymdyq daǵdylaryn damytýǵa, sóıleý, jazý jáne shyǵarmashylyq qabiletterin jetildirýge baǵyttalǵan. Aldaǵy oqý jylynda 1-synyptarǵa 8 synyp-komplekti jasaqtaldy. Mektep jańa oqý jylyna tolyq daıyn», dedi №52 jalpy bilim beretin mekteptiń dırektory Samal Rahmetýllına.
Bastaýysh synyp muǵalimi bul joba balalardyń oılaý qabileti men shyǵarmashylyǵyn damytýǵa úlken septigin tıgizetinin atap ótti. Ata-analar «Balaqaılar mektebi» arqyly balalardyń mektepke degen qyzyǵýshylyǵy artqanyn jáne senimdilikpen oqýǵa daıyndalatynyn jetkizdi.