Jańa oqý jyly bastalǵanǵa deıin 163 bilim berý uıymynda jóndeý jumystary aıaqtalady. Jańartylǵan jáne tolyqtaı qaıta jabdyqtalǵan mektepterde 138 myńnan astam oqýshy bilim alady, dep jazady Egemen.kz.
Oqý-aǵartý mınıstrliginiń málimetinshe, renovasııa baǵdarlamasy aıasynda 127 mektep jańartylǵan. Onda 99 myńǵa jýyq bala oqytalady. Sonymen qatar 1 myńǵa jýyq aýyldyq mektep jańǵyrtylyp, olarǵa kúrdeli jóndeý júrgizilip jatyr. Robototehnıka, hımııa, bıologııa, fızıka jáne STEM pánderi boıynsha 1108 zamanaýı kabınet ornatylǵan.
Keshendi jobalarǵa mektepterdi kúrdeli jóndeý, synyptardy zamanaýı qural-jabdyqtarmen qamtamasyz etý, jıhazdardy jańartý, kitaphanalar men ashanalardy modernızasııalaý, zamanaýı qaýipsizdik júıelerin engizý kiredi.
Bul sharalar qala men aýyl arasyndaǵy bilim sapasyndaǵy alshaqtyqty azaıtýǵa, qazaqstandyq balalar úshin jaıly jáne zamanaýı bilim berý ortasyn qalyptastyrýǵa baǵyttalǵan.