2025 jyldyń 1 tamyzyndaǵy jaǵdaı boıynsha Qazaqstandaǵy zeınetkerlerdiń sany 2 mıllıon 497 myń adamdy quraıdy, dep habarlaıdy Egemen.kz Eńbek jáne halyqty áleýmettik qorǵaý mınıstrligine silteme jasap.
Jyl basynan beri respýblıkalyq bıýdjetten 2 trln 451,4 mlrd teńge kóleminde zeınetaqy tólemderi júzege asyryldy, onyń ishinde:
Bazalyq zeınetaqy tólemine – 793 mlrd teńge,
Yntymaqty zeınetaqy tólemine – 1 trln 658,4 mlrd teńge baǵyttalǵan.
2025 jylǵy 1 tamyzdaǵy jaǵdaı boıynsha respýblıkalyq bıýdjetten tólenetin jıyntyq zeınetaqynyń ortasha mólsheri 143 097 teńgeni qurady. Onyń ishinde:
Yntymaqty zeınetaqy – 95 491 teńge,
Bazalyq zeınetaqy – 47 606 teńge.
Buǵan deıin habarlanǵandaı, 2025 jylǵy 1 qańtardan bastap bazalyq zeınetaqy tóleminiń mólsheri Ulttyq bank aıqyndaǵan boljamdy ınflıasııa deńgeıine (6,5%) sáıkes ulǵaıtyldy, al yntymaqty zeınetaqy 8,5%-ǵa ósti, ıaǵnı ınflıasııa deńgeıinen 2%-ǵa artyq.
Sonymen qatar, Memleket basshysynyń tapsyrmasy boıynsha 2023 jyldan bastap bes jyl ishinde eń tómengi bazalyq zeınetaqy mólsherin kúnkóris mınımýmynyń 70%-yna, al eń joǵarǵy mólsherin 120%-yna deıin kezeń-kezeńimen jyl saıyn arttyrý júzege asyrylyp jatyr.
Osyǵan sáıkes, 2025 jylǵy 1 qańtardan bastap eń tómengi bazalyq zeınetaqy kúnkóris mınımýmynyń 65%-ynan 70%-yna deıin ulǵaıtylyp, 32 360 teńgeni qurady, al eń joǵarǵy mólsheri 105%-dan 110%-ǵa deıin ósip, 50 851 teńgeni qurady.
Aıta keteıik, 2018 jylǵy 1 shildeden bastap memlekettik bazalyq zeınetaqy tólemi ár alýshyǵa jeke taǵaıyndalady, onyń zeınetaqy júıesine qatysý ótili eskeriledi.
Bul rette zeınetaqy júıesine qatysý ótiline 1998 jylǵy 1 qańtarǵa deıin yntymaqty júıede jınaqtalǵan eńbek ótili jáne mindetti zeınetaqy jarnalary (MZJ) tólengen kezeńder engiziledi.
Mysaly:
Eger zeınetaqy júıesine qatysý ótili 10 jyl nemese odan az bolsa, sondaı-aq qatysý ótili múldem bolmasa, bazalyq zeınetaqy mólsheri kúnkóris mınımýmynyń 70%-yn quraıdy.
Árbir qosymsha jyl úshin bul mólsher 2%-ǵa artyp otyrady.
Máselen, 20 jyldyq qatysý ótilinde bazalyq zeınetaqy kúnkóris mınımýmynyń 90%-yn quraıdy.
30 jyl jáne odan da kóp ótil bolǵan jaǵdaıda bazalyq zeınetaqy eń joǵary mólsherde — kúnkóris mınımýmynyń 110%-y kóleminde belgilenedi.
Eger bir aı ishinde Biryńǵaı jınaqtaýshy zeınetaqy qoryna (BJZQ) birneshe ret MZJ aýdarylsa, jınaqtaýshy júıege qatysý merzimi báribir bir aı bolyp esepteledi.
Osylaısha, mindetti zeınetaqy jarnalary neǵurlym turaqty ári tolyq kólemde tólense, zeınet jasyna jetken kezde bazalyq zeınetaqy tóleminiń mólsheri de soǵurlym joǵary bolady.
О́z kezeginde, jasyna baılanysty zeınetaqy tólemderiniń mólsheri 1998 jylǵy 1 qańtardaǵy eńbek ótiline (keminde 6 aı qajet) jáne zeınet jasyna deıingi ortasha aılyq tabysqa baılanysty.