Aqkól qalasyndaǵy telemunara mańynda «Taza Qazaqstan – Taza О́lke» atty aýqymdy ekologııalyq aksııasy ótti. Bul shara turǵyndardyń, ásirese jastardyń tabıǵatqa uqypty qaraý mádenıetin qalyptastyrýǵa jáne ekologııalyq sanany arttyrýǵa baǵyttalǵan respýblıkalyq bastamanyń bir bóligi boldy, dep habarlaıdy Egemen.kz.
Igi bastamanyń negizgi maqsaty – tek qana qoqysty jınaý emes, sonymen qatar qorshaǵan ortany qorǵaýdyń mańyzdylyǵyn tereń túsinýdi qalyptastyrý. Uıymdastyrýshylar eldi mekenderdiń kelbetin jaqsartýmen qatar, ár azamattyń tabıǵatty qorǵaýǵa degen jeke jaýapkershilik sezimin oıatýdy kózdeıdi.
Ekologııalyq aksııaǵa memlekettik qyzmetkerler, eriktiler, qoǵamdyq birlestikterdiń belsendileri, «Jasyl el» jasaqtarynyń músheleri jáne jergilikti turǵyndar qatysty. Barlyǵy birigip qoǵamdyq aýmaqty turmystyq qaldyqtan tazartyp, ekologııalyq birlik pen janashyrlyqtyń jarqyn úlgisin kórsetti.
Aqkól aýdanynyń ákimi Birjan Tasbolatuly sharaǵa arnaıy kelip, mundaı bastamalardyń mańyzdylyǵyna toqtaldy:
«Qorshaǵan ortanyń tazalyǵy – erteńgi kúnge salynǵan ınvestısııa. Tabıǵatty keleshek urpaq úshin saqtaý – barlyǵymyzdyń ortaq mindetimiz. Bul aksııa jastarymyzdyń belsendiligi men birligin aıqyn kórsetti», – dedi aýdan ákimi.
Qatysýshylardyń belsendiligi men uıymshyldyǵynyń arqasynda aksııa ótkizilgen aýmaq tolyqtaı tazartyldy. Bul shara aýdannyń ekologııalyq jaǵdaıyn jaqsartýǵa septigin tıgizip qana qoımaı, ár adamnyń ortaq iske úles qosýy qanshalyqty mańyzdy ekenin taǵy bir márte dáleldedi.